Trent Alexander-Arnold a dam tawh

Liverpool right back Trent Alexander-Arnold chuan damlohna avanga an match hnuhnung pahnih a khelh theih loh hnuah ngai a awh leh tawh a, zanin dar 10:00-a Brentford an lenchilhna tur inkhelah Liverpool manager Jurgen Klopp-a'n a duh chuan a chhawr thei ang.

Reds-in 3-0 ngawta Crystal Palace an hneh ṭum khan Arnold hi rin loh takin squad-ah pawh a awm lo a, Klopp-a'n a right back pawimawh hi a damloh thu a sawi zui. League Cup third round-a 3-0 a Norwich City an hnehna inkhelah pawh a inlan lo a, Brentford laka a kir tur thu hriat hi Premier League kai thar team tan hriat a nuam lo ang.

Klopp chuan, "Trent hi inhliam vang ni loin damlohna avanga chawl a ni a, tunah chuan club training pawh a zawm leh tak avangin a inkhel thei ang," a ti a, malpui hliam vanga chawl reng Roberto Firmino pawh lo kir thei dinhmunah a ding mek.

German coach chuan, "Bobby hian ni hnih thum vel chu training a nei leh tawh a, thlan theih zingah a tel leh tawh. Chutihrual chuan Brentford laka a inkhelh theih dawn leh dawn loh ka la sawi thei lo a, Porto lakah erawh 100% in a inlan thei ang," a ti.

Damlohna avanga a chawlh hnuah James Milner pawhin training a zawm leh tawh a, right back Neco Williams pawh a hliamin dam lam a pan mek - player pahnih hi dam ṭha pawh ni se Brentford laka bul an ṭan erawh a rinawm chiah lo.

Palace laka goal ropui khungtu Naby Keita chu League Cup-a Norwich an hneh ṭuma a hliam avangin a inlan theih a la rinawm chiah lo a, Spanish midfielder Thiago Alcantara pawh Klopp-a'n a lo sawi lawk tawh angin kar hnih vel tal chu a chawlh a la ngai dawn niin a lang.

Reds manager Klopp chuan, "Naby-a hliam hi hliam na tak a ni hran lo a, mahse, a hliamin ngai a awh hun kan nghah ve a ngai a ni. Thiago chu a la inlan thei rih lo chiang sa," tiin a player-te dinhmun a sawifiah.

Liverpool hian season bul an ṭan ṭha hle - league match nga an khelh tawhah vawi khat Chelsea an inhnehtawkpui tih loh chu an chak vek a, Champions League leh League Cup lama an match hmasaah an chak ve ve bawk.

Merseyside club hian Thawhlehni zanah Champions League gourp stage khel turin Porto khelmual an pan zui leh dawn a, Klopp-a'n European football mitthla chunga player a siksawi leh nual a nih pawhin a mak lo ang.