Zanin dar 7:30-ah IPL final Delhi Capitals vs Mumbai Indians

Indian Premier League hmawr bawkna chu zanin dar 7:30 hian Dubai International Stadium-ah khelh a ni dawn. League round-a pakhatna Mumbai Indians leh pahnihna Delhi Capitals ten nomawi an inchuh dawn a, dream final tia sawi theih a ni.

Mumbai Indians-in tun season-ah Delhi Capitals hi vawi thum an hmachhawn tawh a, hnehna an chang vek. An intawn hmasak ber ṭumah Delhi hian bat hmasain wicket 5-in Mumbai an chak.

An intawn vawi hnihnaah pawh Delhi bawk bat hmasain run 110/9 chauh an siam a, Mumbai hian over 14.2 lekah target umphain wicket 9-in an hneh.

Qualifier 1-ah Delhi-in vawm hmasak an thlang ta thung a, result erawh a ngai reng. Mumbai-in run 200/5 zet siamin Delhi-in run 143/8 chauhin an chhanglet.

Delhi Capitals opener Shikhar Dhawan-a'n tun inelnaah run 603 a siam tawh a, final-ah a theihna tak a lantir thei a nih chuan Mumbai Indians an hneh thei ang.

Delhi hian tun inelnaa wicket la hnem ber Kagiso Rabada (29 wickets) an kawl bawk a, chakna tur khawp squad an nei.

Amaherawhchu Mumbai hi team angin an ṭha a, kil tinah an ṭha vek. Opener-ah Quinton de Kock leh Rohit Sharma te an awm a, all rounder ṭha Kieron Pollard leh Hardik Pandya bakah bowler ṭha Jasprit Bumrah te an kawl avangin chak tura rinkai zawk an ni.