United chhantu tur Ronaldo?

Vawiin tlai dar 5:00 hian League Cup-a tla hlim Manchester United-in Aston Villa an mikhual dawn a, Old Trafford-ah Cristiano Ronaldo-a'n lawmna a siam leh thei ang em, tih chu zawhna a ni.

Man United-in West Ham an hneh loh ṭumin Ole Gunnar Solskjaer-a'n player 11 ngawt a thlak a, chung zingah chuan Ronaldo pawh awltir zingah a tel.

Kum 36 mi Ronaldo hian Man United tana a match hmasa pathumah goal li a khung a, en bik tur a ni. Chutih rualin Solskjaer-a'n duh thlan tur a ngah avangin a player rem dan tur hriat a châkawm hle.

Aston Villa hian League Cup-ah Chelsea an hneh lo a, chutihrualin an chak lohna hi penalty chauh a nih avangin hnualna tur a awm lo. League match hnuhnung berah Villa hian Everton 3-0 in an hneh a, an phur vanglai tak a tih theih zawk.

Villa hian Man United aṭanga loan hmanga an hawh Alex Tuanzebe an chhawr thei dawn lo a, hliam vangin Leon Bailey, Morgan Sanson leh Trezequet te an chhawr thei lo ang.