Arsenal mualah Tottenham

"Tun season kan thlen china match pawimawh ber tur," tiin Arsenal manager Mikel Arteta-a'n Tottenham Hotspur nen an inkhelh tur a thlirlawk a, an hmelma club nen Pathianni zan dar 9:00-a North London Derby an khelh tur hi a boruak a sang leh khawp ang.

Duhthusama season bul ṭan Tottenham an zuih leh mek a, chhe taka bul ṭan Arsenal hi an tho chhuak leh mek thung. A awlsam zawnga sawi chuan Gunners leh Spurs hi team nghet lo tak an la ni a, inkhel pahnih khat leka dinhmun inthlak danglam dawrh dawrh thei reng an la ni.

Arteta naute hi an league match hmasa pathumah an tlawm vek, hetihlai hian Spurs hi an chak vek thung. Mahse, Arsenal hian an mikhual hi goal hnih china an hneh thei a nih chuan table-ah an kal kan leh thei der dawn.

Fans an mamawh
Kar laihawla Arsenal-in League Cup an khelh kha a hmunah mi 50,000 chuangin an en a, an result ṭha lo tak avang leh hripui leng kara inkhel entu ngah tawk lo Gunners tan chanchin lawmawm a ni, tun ṭumah pawh hian fans puihna an mamawh dawn.

Gunners manager Arteta chuan, "Beidawng loa min thlawp tlattute hi kan chakna hnar an ni, kar laihawla inkhel en tura khatiang zat an pungkhawm thei kha a mak. Tottenham nen kan inkhelh leh hunah pawh an puihna kan mamawh," a ti.

Arsene Wenger hun laia attacking football hmuhnawm chhawp chhuak ṭhin hian goal khung an harsat. An league match hmasa pangaah goal hnih chiah an khung, fans lamin an duh ang inkhel an hmuh loh avangin match zawh hmaa haw an tam ṭhin, tunah chuan an boruak a ṭha leh ṭan.

Gunners an harh
Nipui bazarah sum an hmang hnem a, result an nei ṭha si lo. Technical director Edu-a'n, "Kan khelh kim theih hun min nhak rawh u," tiin a sawi a; an match hnuhnung pathuma an chak zawn avangin a thlawnin sum an hmang bik lo tih a lang ṭan.

Burnley an hneh ṭuma lutte kha chawh rualin kum 22 bawr vel chauh an ni a, pound maktaduai 50 man Ben White-a'n tihsual la nei zauh zauh ṭhin mah se a kianga ding Gabriel nen an inkawp rem, league match hnuhnung pahnihah goal an chhuah lo.

Mesut Ozil chhuah hnua Arsenal mamawh tak chu 'creative midfielder' tia sawi ngam a ni. Real Madrid aṭangin Martin Odegaard an la nghet a, ani hian Clarets lakah freekick mawi a chhuih lut a, zaninah pawh Pierre-Emerick Aubameyang chawmtu tur a ni ang.

Hremna hmang zo Granit Xhaka a lo kir thei tawh dawn, Swiss midfielder hi Thomas Partey nen an inkawp a nih chuan Spurs tan hmachawn an harsa ve sawt dawn, chutih rualin inkhel boruak sangah Xhaka tan card hmuh loh zir a pawimawh dawn.

Arteta-a'n rawlthar Bukayo Saka leh Emile Smith Rowe te a ring ngam a, English player pahnih hian fans beisei ang tak erawh an la chhawp chhuak lo. Smith Rowe-a'n League Cup-ah goal a khung a, league lamah khung chhunzawm a tum ang.

Spurs an buai
Champion nomawi duh vangin Jose Mourinho an lalut a, mahse Portuguese manager an ban aṭangin thla nga a liam leh tawh - nomawi chu an la chawi chuang hlei lo a, tunah chuan Nuno Espirito Santo enkawlna hnuaiah an khel.

A nihna takah chuan Nuno hi an duh ber a ni lo, manager hrang hrang an biakte an rem loh hnua an lak a ni. Manager zawn an harsat a, an striker ṭha ber Harry Kane-a'n chhuah a duh thu ualau takin a sawi ngam bawk.

Amaherawhchu, club lamin luhlul chhuahin Kane an chelh a, rilru bet lo tak chungin an kawl chhunzawm. England captain hian tun season league match li a khelhah goal a la khung lo - hei erawh hria ila, Kane hi North London Derby top scorer (11 goals) ni lai a ni.

Nuno-a'n striker ṭha mi Kane leh Son Heung-min te a inkawp fuh tir thei a nih chuan Arsenal tlarhnung tan buaina tham a ni ang. Kane chauh pawh buaipui tham a nih dawn tehlul nen, South Korea international hi season hmasa an intawn ṭuma goal mawi khungtu kha a ni bawk.

EPL season kal laia goal khung tura remchang insiam tlem ber (32) Spurs hian insiamṭhat an mamawh a, manager Nuno-a'n, "Siamrem ngai tam tak kan nei," tih kha a chingfel hman a nih chuan an hmelma lakah chak an beisei ang, an siamṭha lo a nih chuan mangchhiain a la zui thei a ni.