Goal khung lo Barca; Koeman an hnawt chhuak!
Ningani zan khan Barcelona chuan tun season La Liga-a vawi khat chiah la chak Cadiz an lenchilh a, khualmualah goal an khung loh avangin point khata an lungawi a ṭul.
Barcelona midfielder Frenkie de Jong chu minute 65-naah a yellow card pahnihna avangin hnawhchhuah a ni a, hun pek belhah Ronald Koeman chu official a ṭawngkhum avangin hnawhchhuah a ni bawk!
Tuna zawhna chu Barca thuneitu lam hian engtia rei nge Koeman an chelh ang, tih chu a ni a, league match ngaah point kua chiah neiin pasarihna dinhmun an luah mek - match khata khel tlem chungin hmahruaitu Real Madrid chu point sarihin an thlau.
Pathianni zan dar 7:45-ah Barca hian Levante an mikhual zui dawn a, hnehna an chang zo lo leh a nih ngat chuan Koeman-a dinhmun a nghet lo lehzual sawt ang.
Barca an nghing
Suma talbuai ve tak Barcelona hian season dangah Cadiz lakah hnehna chang lo se Cadiz zawk hi vannei tiin an sawi ngei ang - mahse, thawnthu a danglam tawh a, Cadiz lakah Barca an vannei zawk!
Minute 65-naah minute li chhunga yellow card vawi hnih a hmuh avangin Barca midfielder De Jong hnawhchhuah a ni a, Cadiz-in Lionel Messi awm tawh lohna Barca an zuam zual sauh.
Alvaro Negredo, Salvi Sanchez leh Anthony Lozano ten Cadiz tan chance duhawm an nei vek a, mahse, Barca-in keeper Marc-Andre ter Stegen an nei a, German keeper zarah an him.
Barca tan tlarhmaah Memphis Depay chu player langsar ber a ni a, mahse, Dutch forward hian a chance neihte holam taka a hlah ṭhin avangin goal a khung thei lo a, a tawpah 0-0 in team pahnih an inhnehtawk.
Koeman an hnawt chhuak!
De Jong hnawhchhuah a nihin Koeman-a'n a lungawi lohna nasa takin a lantir a, injury time-a Sergio Busquets-a'n yellow card a hmuh leh meuh chuan Dutch coach a insum zo lo a, hnawhchhuah a ni!
Inkhelh zawh lamah pawh Koeman a insum lo a, Dutch coach ṭawng duh ve tak hian Spain-a match official hna thawk ṭhinte a dem zui. Kum 58 mi coach chuan, "Spain-a buaina lian tak pakhat chu ṭul loa an hnawt chhuak ṭhin che hi a ni," tiin a sawi.
Koeman chuan sawi chhunzawmin, "Min hnawhchhuah chhan sawi tur an hre lo a, nungchang an mawhpuh leh ringawt zel," a ti a, awmze nei lo leh chhan awm loa hnawhchhuahah a inngai.
Dutch coach chuan a dinhmun sawi zuiin, "Mi paukhauh tak ka ni a, press nena inbeihna ka ngaihtuah lo. He team tan hian ka theihna zawng zawng ka hlan dawn a, ka player-te pawhin an theihna zawng zawng an hlan tih ka hmu a, ka tan chuan chu chu a tawk a ni," a ti a, media lam chuan an duh apiang an ziah theih thu a sawi zui.
A tawk lo
Koeman-a'n nipui transfer-ah player leina tur pawisa a nei tawk lo a, Messi leh Antoine Griezmann a chân bawk - Cadiz lakah kum 17 mi Gavi-a'n a vawi khat nan bul a ṭan a, tlarhmaah kum 18 mi Yusuf Demir chuan bul a ṭan bawk.
Barca midfielder Sergi Roberto chuan, "Keini chuan La Liga nomawi chawi kan tum tur a ni a, top four-a lungawi tur club kan ni lo," a ti a, tunah erawh table-ah pasarihna an ni mek!
Gerard Pique chuan, "Pahnihna emaw pathumna emaw ni turin Barca jersey ka ha lo a, he hmunah hian nomawi chawi ngei ka tum. Kan bul ṭan dan chu eng pawh ni se, nomawi kan chawi thei tih ka ring tlat," a ti ve bawk.
Pique chuan, "Fans-in min thlawp tlat kan mamawh a ni," a ti zui a, player leh coach-ten fans thlawpna an mamawh thu an sawi fo chuan club-in chuai lam a pan tawh tihna a ni tlangpui!