Roma chakna Tammy Abraham

Jose Mourinho-a'n Serie A lamah boruak a nei lian, a kalna lam apianga thawm nei ring ṭhin manager enkawl AS Roma chuan an mikhual Udinese 1-0 in an hneh hram a, goal awmchhun hi Tammy Abraham khung a ni.

Inkhel dangah Napoli chuan Sampdoria 4-0 in an luhchhuah a, league match nga an khelh tawhah an chak fai vel. Luciano Spalletti chuan goal li lai khung mah se awlsam taka an chak bik loh thu a sawi chhuak.

Goal khat a tawk
Ningani zan Stadio Olimpico-a inkhelah Roma lamin goal khung an harsat a, mahse minute 36-naa Abraham-a goal khung an veng tluan thei; league match nga aṭanga vawi li an chak theih avangin Mourinho nauten champion an tum ngam ang.

Mourinho chuan, "Match hmasa zawkah kan chak lo a, a dawt chiaha inkhelh leh hi a harsa ṭhin. Chutih rualin hun chanve hma lama kan khelh ṭhat zawk miau avangin chak kan phu, goal khat chauh khung mah ila hun ṭha kan insiam hnem theih avangin ka lawm," a ti.

Roma hian Pathianni zanah Lazio an lenchilh leh nghal dawn. Lazio hi Torino nen 1-1 a inhnehtawk hlim an ni a, team pahnihin hahchawlhna hun an neih tlem avangin manager pahnihin an player an siksawi ngei a ngaih a rinawm.

100% Napoli
Serie A match li aṭanga vawi li an chak kha an club record a ni tawh a, tunah chuan match nga aṭangin vawi nga an chak ta. Luciano Spalletti enkawl Napoli chuan an mikhualna ramah Sampdoria 4-0 in an hneh a, league hmahruaitu an nih chhunzawm.

Napoli tan hian Victor Osimhen-a'n goal hnih a khung bakah, midfielder pahnih Fabian Ruiz leh Piotr Zielinski ten goal khat ve ve an khung a, an match hnuhnung pahnihah goal riat khungin anmahni lamah a lut ve miah lo.

Spalletti chuan, "Goal li faia kan chak avangin inkhel kha a awlsam tihna a ni ngawt lo. David Ospina khan hna a thawk ṭha em em a, kan mualpho theihna tur tam tak min hliah khuh, goal khungtu lam chauh ni loin a venghimtu lam pawhin fak an phu," a ti.