Hummels-a'n Bellingham a fak

Borussia Dortmund defender Mats Hummels chuan club tana a khelhpui Jude Bellingham chu kum 18 a hmuh tawh zinga player puitling ber a nih thu a sawi. Germany international defender Hummels hian Mario Gotze leh Christian Pulisic te naupan lai a hmuh avangin a fakna hi English midfielder tan a hlu khawp ang.

Bundesliga nomawi vawi ruk chawi tawh Hummels chuan, "Mario Gotze kha kum 18 a nih chuan player ṭha tak a ni tawh a, football a la thutak tawh hle. Mahse, Jude hi kum 18 ka hmuh tawhah chuan a puitling ber. Team chhungah hruaitu a ni a, team hotu ṭha a ni. Footballer ṭha tak a nih bakah mi ṭha tak a ni a, ṭum 25 vel chu hmai chhanah ka ngainat thu ka hrilh tawh. Hma a sawn zel ang tih hi ka ring tlat," tiin Bellingham a fak.

Bellingham hian England tan match riat a khel tawh a, Champions League-a English player khualmuala goal khung thei naupang ber a ni. Season liam ta khan Borussia Dortmund tan inelna hrang hrangah match 46-ah goal li a khung a, tun season-ah league bikah match nga khel tawhin goal khat a khung.

Zanin dar 10:00 hian Dortmund hian Borussia Monchengladbach hma-chhawn turin Borussia-Park an tlawh ang. Marco Rose-a hote hi match nga khelah point 12 hmuin pathumnaah an awm mek.