Derby County tan beisei tur a awm
Derby County administrator-te chuan Championship club hi ding khaw chhuak turin 95% chance a awm thu an sawi a, hmun ruk aṭangin Rams lei duh hi an awm. Derby hi sum lama an tlakchhiat avangin sumdawnna kawnga finchhuahtu pawl 'Quantuma' kutah Nilaini aṭang khan a awm a, dan angin Championship club hi point 12 paihsak an ni bawk.
Club buaina
Derby County neitu Mel Morris chuan June 2019 aṭang khan a club hi hralh chhawn tumin a lo zuar tawh a, mahse, inbiakna an nei ṭhin chungin beisei angin a fel thei ṭhin lo a, administration hial an sawi ri ta.
March thla khan Abu Dhabi-a hmunpui nei Bin Zayed Group nena thawk ho Derventio Holdings nen inbiakna neih ni mah se Mel Morris-a dawhtheihnain a tlin lo a, sumdawng dang nen inbiakna a kalpui zui.
April thla khan Spanish sumdawng hausa Erik Alonso nen inremna an nei leh a, mahse, No Limit Sports Limited neitupa hian a hunah tak sum a pek theih loh avangin May thla khan inbiakna hi a tawp zui. Derby-in club hralh mai tur an hmu lo.
Administration chu
Suma club an talbuaiin administration-ah an lut ṭhin a, club chhanhim nana tih a ni ber - chutianga administration-a an luh chuan club enkawlna zawng zawng kha administrator-te kutah a awm.
Administrator-te chuan khelmual lam tiam loin club inrelbawlna zawng zawng an kalpui ang a, hetih chhung hian club lei duh tur an zawnsak ang a, an hmu lo a nih chuan club bungrua tihral theihte tiralin ba an rulhsak ang.
Football-ah chuan heta hralh theih tih hi player, ground, training-na khelmual leh bungrua te a ni a, ba rulh tur tihah hian pek hmasak tur an awm leh bawk.
Club-in sum ba a pek hmasak ber tur chu player-te an ni a, a dawtah manager niin, a dawtah football club dangte an ni - Professional Footballers Association (PFA) leh league-ten an dawt ve leh a ni.
Derby an thunun
Derby County hi an insiamrem theih loh avangin Nilaini aṭangin administration hnuaiah an awm a, amaherawhchu beisei tur a awm. Administration an nih avanga club enkawltu Quantuma managing directors Hosking, Carl Jackson leh Andrew Andronikou te chuan club-in leitu a hmuh hmaa thla thum chhunga a lo inrelbawlna tur sum lakluh dan an zawng dawn.
Hosking chuan, "Ka thlirna aṭang chuan Derby County tan club ding khaw chhuak turin 95% chance a awm a, thla a liam ang a, kan chinfel theih ngei ka ring. Hetia harsatna an tawh lai hian team ti phur thei tur manager an mamawh. Hei erawh kan kutah a awm lo," tiin a sawi.
Derby-in Wayne Rooney an kawl hi an vannei a, kum 35 mi English manager hian club-in buaina a tawh laiin tlanchhiatsan a tum lo. Manchester United leh England forward hlui Rooney chuan, "Team tan theihtawp ka chhuah dawn. Hruaitu an mamawh a, ka awm a ṭul a ni," tiin a sawi. Chutihrualin Rooney hian club neitu Mel Morris chu chanchin kimchang a hrilh loh avangin August 9 aṭangin a biak tawh loh thu a sawi bawk.
Rams hi point 12 an paihsak avangin table-ah a mawngphahah an awm a, point -2 an la hmu mek. Zanin dar 7:30 hian Bramall Lane-ah Sheffield United hmachhawn turin an lenglut ang.