KKR-in Mumbai Indians an hneh

Indian Premier League champion lai Mumbai Indians-in United Arab Emirates-ah result ṭha a nei thei lo a, Chennai Super Kings an hneh loh hnuah Ningani zan khan Kolkata Knight Riders an hneh lo. KKR hian wicket sarihin hnehna an chang a, ball 29 an dah bang thei bawk.

Ṭhumvawrah KKR an vannei a, vawm hmasak an thlang. Mumbai Indians-in over 20-ah 155/6 runs an siam a, Quinton de Kock (55), Rohit Sharma (33) leh Kieron Pollard (21) te che ṭha mah se batsman dangin an thlawp ṭhat tawk loh avangin run an siam tam tawk lo.

KKR tan Shubman Gill-a'n 13 runs chauh siam mah se Venkatesh Iyer-a'n ball 30 lekah 53 runs a vaw chhuak a, Rahul Tripathi-a'n ball 42-ah 74 runs siam bawkin over 15.1 lekah 159/3 runs siamin hnehna an chang.

Vawiinah IPL inkhel match hnih en tur a awm dawn. Tlai dar 3:30-ah Delhi Capitals leh Rajasthan Royals te an inkhel ang a, zan dar 7:30-ah Sunrisers Hyderabad leh Punjab Kings te an inkhel ang. September 26, Pathianni zan dar 7:30-ah Royal Challenger Bangalore leh Mumbai Indians te an inhmachhawn bawk dawn.