Kroos a lo kir hnai

Tun season-a hliam vanga la inlan miah lo Toni Kroos chuan ṭha takin club training a zawm ve leh ta a, Real Madrid midfielder hian ngai a awh chho thei a nih chuan Spanish club an ṭha leh sawt dawn.

Kartir khan Kroos hian training zangkhai deuh zawk a ṭan leh tawh a, tunah chuan training pangngai tak a zawm leh tak avangin Real beiseina a sang - zanin dar 12:30-a Villarreal an hmachhawn hunah erawh a inlan a la rinawm chiah lo zawk.

German midfielder thiam bik hi Real tan a lo kir thei a nih chuan Casemiro leh Luka Modric te nen an ding ho leh thei dawn tihna a ni a, Federico Valverde leh nipui transfer-a lakluh, rawlthar duhawm Eduardo Camavinga te tan chance a tlem leh hret dawn tihna a ni thung.

Carlo Ancelotti kaihhruaina hnuaiah Real-in nasa takin hma an sawn a, league match ruk an khelh tawhah vawi nga chakin vawi khat an khingpui an inhnehtawkpui a, La Liga table chung ber an luah mek.