Rangers-in goal riat an khung

Steven Gerrard-a'n coaching lamah pawh a duai lo tih a pholan chhunzawm zel a, a team enkawl Rangers chu Scottish Premiership-ah 8-0 ngawtin hnehna a chanpui!

Rangers hian an mikhual Hamilton Academical lakah zahngaihna lantir loin goal riat an khung a, Kemar Roofe, Joe Aribo leh James Tavernier-ten goal hnih ṭheuh an khung a, Scott Arfield leh Brandon Barker-ten goal khat ve ve an khung bawk. 

Gerrard enkawl Rangers goal khung zinga goal khat chiah hi penalty aṭanga lut a ni a, Tavernier-a pet goal a ni. Kum 2013-a Scottish top flight football hming Scottish Premiership tih a nih hnua team-in hnehna an chan chian ber ṭum a ni.

Rangers hian Scottish Premiership-ah hma an hruai chhunzawm zel a, an hnuai chiahah anni aia match hniha khel tlem Celtic an awm. Celtic hian 4-1 in Motherwell an sawp ve bawk a, Point kuain Rangers an phak lo mek. 

Steven Gerrard chuan, "Kan khel hmuh a nuam a, chiang taka hnehna chang chungin goal kan chhuah lo a ni," a ti a, Rangers hian tun season inelna hrang hrangah tlawm an la nei lo.