Premier League champion Manchester City

Pep Guardiola hoten an nghak chhuak ta a, Manchester City chu Premier League champion an ni.

City champion-na goal khungtu erawh West Bromwich Albion forward Jay Rodriguez a ni a, Manchester United lama a khung a ni daih bawk. Pathianni zan inkhelah hian City inrawlh lo mah se anmahni hnaih bertu Jose Mourinho hote an chak loh avangin umpha thei an awm tawh lo.

A vawrtawp a ni lo!
Manchester City-in a vawrtawp thlen theihna hun ṭha an nei a, Etihad Stadium-a an hmelma Manchester United hnehin champion theihna hun ṭha an nei a, goal hnih an khung hmasak hnuah hun ṭha bawhpelhin 3-2 a chak loin mualpho nan an hmang. Champion turin nghah rei hret a ngaih phah a, hun ṭha bik a liam bawk.

Lawmna mittui aia lungaihna mittui a far hnuah Liverpool-in nomawi zinga an duh ber Champions League aṭangin an hnawt chhuak a, Etihad Stadium-ah an tlawm nawn a, Europe inelna ni mah se he inkhel result hian Premier League nomawi a tibal pha!

Pep Guardiola-a'n Inrinnia Tottenham Hotspur an hneh zawhah an la champion mai a ring lo a, United an chak ngei a rin avangin a fapa nena golf khelh a thlan zawk thu a sawi a, mipui chauh ni loin team pawh hmun khatah an awm lo tihna a ni. City hian anmahni ṭantute nen an champion tih an hre rual a ni thei a, amaherawhchu an awmna hmun a inan hlawm loh avangin 'boruak duhawm bik' tem tur an nei lo.

Champion chu champion
Man City captain Vincent Kompany chuan a vawi thum nan nomawi a chawi a, Belgian defender chuan, "Kan champion hmasak ber ang tho kha a ni a, sawifiah thiam theih a ni lo. Kan champion-na hi inelna harsa tak a ni a, he dinhmun kan thlen theihna tura inrawlh zawng zawngte ka chhuang em em a ni," tiin an champion chu sawi nep theih a nih loh thu a sawi.

A ropuina lai sawi langin Kompany chuan, "Tun ṭuma kan champion danglamna chu season tluanin kan khel ṭha a, ṭha takin kan khel reng thei a, kan beisei angin kan khel chhuak a ni," tiin league thunun chunga an champion thei chu lawmawm a tih thu a sawi.

Hun pawimawh bik
Watford 0-6 Manchester City (16 September 2017): City-in chhanletna tel loin goal ruk an khung a, hemi hma chiah hian Liverpool lakah goal nga an khung tawh bawk. He inkhel zawh aṭang hian league hmahruaitu an ni a, table chung ber chu awmna hmun nghetah an siam nghal bawk.

Manchester City 2-1 Southampton (29 November 2017): Southampton-in an chelh dawn tawha an ngaih hnuah minute 96-naah Raheem Sterling-a'n chakna goal a khung a, hemi hma leh hnu inkhelah hian Huddersfield leh West Ham chu 2-1 thoin an hneh a, chakna goal hi hun tawp lama an khung ve ve a ni bawk.

Manchester City 3-1 Newcastle United (20 January 2018): City-in Liverpool hneh loin Premier League-ah an tlawm a, amaherawhchu Newcastle 3-1 a hnehin a tho lehnghal a, tawnhriat nei ṭha Sergio Aguero-a'n hattrick a siam.

Manchester City 2-3 Manchester United (7 April 2018) : City-in an hmelma United lakah minute 30 chhungin goal hnih an khung a, amaherawhchu second half-ah goal thum an chhuah avangin Premier League champion tura hun mamawh tlem ber an nih theihna hun ṭha an bawhpelh.

Tottenham 1-3 Manchester City (14 April 2018): Kar khat chhung leka vawi thum an chak loh hnuin Premier League-a club ṭha ber zinga mi Tottenham chu Wembley Stadium-ah 3-1 in an luhchhuah a, hun tawp hamrik zawhah la champion lo mah se he inkhela point thum an hlawhchhuah hi tuna an champion theihna chhan hi a ni.