Record an siam tawh leh khum theih te:

PL chak zawn rei ber : City chuan chak zawn rei ber record thar siamin a zawnin vawi 18 an chak. Bournemouth (August 26, 2017) aṭanga inṭanin December 28, 2017-a Newcastle an hneh thleng a awh a, hemi zawh hian Crystal Palace nen goal lut loin an inhnehtawk.

PL-a khualmuala chak zawn rei ber : City hi khualmualah match 11 a zawnin an chak a, Newcastle an hneh zawh rualin a tawp. Hetah erawh record thar siam loin Chelsea (6 April 2008–7 December 2008) record siam tawh chu an nihrual chiah.

Chak ngun ber : Vawi 28 an chak tawh a, match nga khelh hmabak an la neihah Chelsea record vawi 30 khum turin vawi thum chak chiah an mamawh tawh.

Champion chiang ber : City hi anmahni hnaih bertu Manchester United aiin point 16-in an fal zawk a, amaherawhchu United chu point 18 a falin an lo champion tawh a, hemi khum tur chuan Jose Mourinho hote an chetsual tel a ṭul ang.

Khualmuala chak hnem ber : City-in khualmualah vawi 14 hnehna an chang tawh a, record siam turin West Ham leh Southampton an tlawh huna chak a ngai. Chelsea chu vawi 15 khualmuala chak chungin an champion tawh.

Goal difference ṭha ber : City hian goal difference-ah +66 an nei mek a, Chelsea record neih lai +71 chu an khum ngei dawn niin a lang.

Goal khung tam ber : Chelsea-in season khatah goal 103 an khung tawh a, City hian match nga khelh hma bakah tluk pha turin goal 10 an la mamawh.

Mahni muala goal khung hnem ber : Chelsea-in an mualah goal 68 khungin record an lo siam tawh a, City hian tun season-ah Etihad Stadium-ah goal 53 an khung tawh a, match thum chiah an muala an khelh tawh dawn avangin khum theih la ni mah se khum a harsa tawh ang.

Point hmu tam ber : Chelsea-in 2004-05 season-ah point 95 an hmu a, City-in point 87 an la hmu mek. Match nga khelh tur an la nei a, record thar mai ni loin point 100 hmu tling thei hmasa ber an la ni thei.

Engtin zel?
Pep Guardiola chu Premier League Manager of the Month a zawna vawi li dawng thei hmasa ber a ni.

Guardiola hi Spanish zinga English top flight-a team enkawl champion pui thei hmasa ber a ni a, Pep-a hi top flight league-ah season kaw chhungin vawi sarih a champion.

City hi Premier League-ah vawi thum an champion ta, Arsenal record tluk chiahin Manchester United (13) leh Chelsea (5) te chiah anni aia champion ngun an awm.

Champion nemngheh hma kawngah pahnihna an ni a, Sir Alex Ferguson-a kaihhruaihna hnuaiah United-in 14 April 2001 khan PL-ah an champion tih an nemngheta a, ni khat chiahin an pha lo.

City hi match nga khelh tur a la awmin an champion a, Manchester United (1907-08) leh (2000-01) bakah Everton (1984-85) te chu match nga khelh tur la awm chungin an lo champion tawh bawk.

Sergio Aguero chuan club record siamin inelna hrang hrangah English club tan hian goal 199 a khung tawh.