Goa ngamtu East Bengal-in final lut
Indian Super League leh I League club-te inelna Indian Super Cup final-ah East Bengal an lut. Kolkata club hian nimin khan FC Goa chu semifinal-ah 1-0 in an hneh a, Super Cup final lut hmasa ber an ni.
East Bengal tana goal awmchhun hi tun hnaia fan-te nena inhmu thiam lo Dudu Omagbemi khung a ni a, Nigerian striker hi hliam avangin lakchhuah a ngai nghal thung. Vawiin tlai dar 4:00-ah Mohun Bagan leh Bengaluru FC ten semifinal pakhat zawk an khel ve leh dawn a, Super Cup hmasa berah Kolkata derby kan hmu a nih pawhin a mak lo ang.
Inkhelh hma
Bhubaneswar-a team pahnih intawn hma hauhin boruak a sang a, Goa-in quarterfinal an khelh ṭuma buaina avangin an player pawimawh Bruno Pinheiro, Sergio Juste leh Brandon Fernandes te chu semifinal khel thei lo turin AIFF-in a hrem a, Hugo Boumous leh Pranoy Halder te chu yellow card pahnih an hmuh tawh avanga hrem niin player pali ngawt hliam vangin an inlan thei lo bawk.
Goa coach Derrick Pereira chuan, "Ka player-ten an himna tur an ngaihtuahna lamah hrem an tawk a, player pakua ka chhawr theih dawn loh avangin duhthlan tur 14 chiah ka nei," tiin a lungawi lo hle.
Hei le East Bengal
Goa-in an player ṭha rual panga an chhawr thei lo a, East Bengal tan chak loh chu mualphona nasa tak a ni dawn tih a lang. Kolkata club-in chak duhin inkhel ṭantir aṭangin an nawr nghal a, Katsumi Yusa, Dudu leh Laldanmawia Ralte ten an chance neih an chhawr thei lo vek.
ISL top scorer Ferran Corominas-a'n chawlhlawk hmain Goa tan chance duhawm a nei a, mah se a goal ngei dawn nia a lan tawh hnuah Lalramchullova'n line aṭangin a pet chhuak hman.
A goal ta
Second half-ah dan pangngaiin East Bengal-in an nawr chhunzawm a, Aizawl FC midfielder hlui Mahmoud Al Amna che vel chu hmuhnawm tham a ni - minute 79-naah Dudu-a'n goal a khung ta nge nge a, vawi hnih ngawt chance duhawm a hlah hnuah Katsumi hnen aṭanga a ball hmuh chu a thlawn a chantir tawh lo.
Hun tawp nan minute riat chiah a awm tawh a, FC Goa captain Edu Bedia chu Ansumana Kromah a tih tluk avangin hnawhchhuah a ni zui a, ISL club tan thawh ngaihna a awm tawh lo.