Monaco hnuaichhiahtu PSG an champion

Paris Saint-Germain chuan champion lai AS Monaco chu 7-1 ngawta sawpin French Ligue 1 champion an ni. Paris club hi tun hnai season ruk chhunga a vawi nga nan league-ah pakhatna an ni thei.

Pathianni zan
Parc des Princes-a inkhelah a tir aṭanga a tawp thlengin mualneitu an chungnung tluan chhuak zak. PSG tan hian Giovani lo Celso leh Angel di Maria ten goal hnih an khung a, Edinson Cavani, Julian Draxler leh Rony Lopes ten goal khat ṭheuh an khung bawk. Monaco tana captain Radamel Falcao goal khungin an mualpho tur a hliahkhuh lo chiang hle.

France Roreltu
Season hmasa khan Monaco chuan PSG chunga awmin, kum 17 hnua a vawi khat nan Ligue 1 nomawi an chawi a, Champions League semifinal an thlen theih bawk avangin Leonardo Jardim leh a naute hnathawh hian khawvel a deng chhuak hneh hle.

Amaherawhchu, Monaco hian nipui bazar laiin an player ṭha an chelh thei lo. Rawlthar duhawm Kylian Mbappe chu an elpui PSG lakah an chân a, Benjamin Mendy, Tiemoue Bakayoko leh Bernardo Silva te chuan Premier League club an zawm bawk.

Colombia international Falcao, Thomas Lemar leh Fabinho te rinawm mah se Paris club el phak tur chuan an lian tawk tawh lo. Thla hmasa mai khan team pahnihte hian French League Cup final an khel a, Unai Emery nauten si thum faiin hnehna an chang. France-ah roreltu an inthlak leh tawh.

PSG hian league match 33 khelh aṭanga point 87 hmuin, anmahni hnaih bertu Monaco aiin point 17 zetin an sang fal; match nga khelh tur an la neihah an champion fel der tawh; French Cup semifinal an luh tawh bawk avangin nomawi pathum chawi chungin season khar an besei mek.

Mahse maw...
Arab sumdang hausaten khawvela a ṭha ber nih an duh a, Ligue 1, League Cup leh French Cup te an duhtawk loh avangin Laurent Blanc banin Unai Emery an lalut. Sevilla manager hlui hi a zawna Europa League nomawi vawi thum chawi thei a ni a, Paris club-in an lakluh chhan chu Champions League nomawi chawi an duh vang a ni.

Mahse, Spanish manager Emery hian season hnih chhungin an duh ber UCL nomawi a chawipui thei lo. Kum 46 mi Emery hian a tirah kum hnih daih contract a ziak a, tun season-ah nomawi pathum chawi leh pawh ni se a contract hi an pawhsei a rinawm tawh loh.

Emery chuan, "Europe-a hlawhtling tur chuan mahni league-ah chetṭhat hmasak a ngai a, tun anga PSG a kal zel a nih chuan UCL nomawi chawi hun chu a la awm ang. Kum 20 liam ta kha chuan PSG tan league nomawi hi a lian uchuak hle, tunah chuan khawvel club lian leh ṭha zingah a ber nih a tum der tawh a ni. He hmunah hian ka hlim a, ka thil tum leh he club-in hma a lak dan hrang hrang hi ka chiang a ni," tiin a hma hun a sawi chiang duh rih lo.

Season a la tawp lo a, hetichung hian season thara PSG manager thar tur inrinsiak vanglai a ni der tawh. Tun dinhmunah chuan PSG hian Borussia Dortmund manager hlui Thomas Tuchel an lalut dawn niin a lang; German manager hian Bundesliga champion Bayern Munich enkawl thei tura hun ṭha a neih pawh a hnar niin khawthlang media te chuan an tarlang a ni.

Neymar pawh?
Brazil captain Neymar-a'n Barcelona aṭangin PSG a zawm a, pound maktaduai 200 man Neymar hi khawvel footballer manto ber a ni. Paris club tan inelna hrang hrangah match 30 a khelh aṭangin goal 28 a khung sak nghal.

Mahse, kum 26 mi hian February thla khan a kerekah hliam a tawk a, tun thlengin a la inkhel thei lo. Khawthlang media-te chuan Neymar hi Paris-ah a hlim lo niin an sawi leh tawh a, player ṭha

leh an mit it zawng hlah ngai lo Real Madrid nen an sawizawm mek. Spanish club lian hian squad tih chak zual an duh a nih chuan Neymar hi an dawr a nih pawhin a mak lo ang.