Newcastle-in Arsenal an hneh
Pathianni zan Premier League inkhelah Newcastle lakah Arsenal 2-1 in an tlawm a, an chak loh hnuah Arsene Wenger chuan khualmuala result ṭha an nei thei lo chu manganthlak a tih thu a sawi.
St James’ Park-a inkhelah Pierre-Emerick Aubameyang leh Alexandre Lacazette te chu a vawi khat nen khelmualah an lut rual a, Gabon international hian Lyon striker hlui goal khung tur a siamsak.
Amaherawhchu, striker thar pahnih hnathawh ṭhat hian a daih rei lo. Rafael Benitez-a nauten Ayoze Perez hmangin an sut a, second half-ah Matt Ritchie hmangin chakna goal an khung bawk.
Chhuanlam
Ningani zan khan Arsenal hi Russia khawpui Moscow-ah Europa League khelin an zin chhuak a, Wenger chuan ni thumnia Premier League khelh leh nghal chu a harsat thu a sawi.
Gunners manager Wenger chuan, "Ball possession kha 70% a ni a, si khat faia hma kan hruai bakah hun ṭha kan insiam hnem hle bawk. Mahse, a tawpah kan chak lo zui, hei hi tun season chhunga khualmuala kan chetdan chu a ni, a makin hriatthiam a har," tiin a sawi.
North London club hi a zawnin khelmuala league match vawi nga an khelhah an tlawm vek a, 1984 December thla hnua an record chhiat ber ṭum an tawng mek. Tun season chhungin league match vawi 11-ah an tlawmna chiah a ni bawk a, Wenger-a'n a enkawl hnua an season hman chhiat ber (2005-06) an tluk chiah bawk!
Point 40
Premier League champion Manchester City lakah Arsenal hi point 33 zetin an hniam zawk a, club lian inti ve tan chuan an inthlauhna hi a tam hle. Newcastle erawhin point 41 hmu ve chiah mah se kai thar team tan chanchin chhia a ni hran lo.
League match nga chiah khelh tur an nei tawh a, Benitez-a naute hi table-ah 10-na ni mekin, chhiarkawp danin tla thei la ni mah se an dinhmun hi a him thawkhawt tawh rih hle.
Magpies manager Benitez chuan, "Point 41 hian kan him tawh ka ring. Player, fans leh Newcastle tan chanchin lawmawm tak a ni. Tun ṭumah
hian football ropui kan khel lo, mah se team ṭha kan hmachhawn avangin hnehna kan chan theih dan turin kan khel mai a ni," tiin a sawi.