PVL Semifinal Durtlang North hmaah Tuichangral

Mizoram Basketball Association hnuaia inelna lian ber RS Traders Pro Volleyball League chu zanin dar 8:00 hian semifinal hmasa zawk khelh a ni dawn. Durtlang North leh Tuichangral te R. Dengthuama Indoor Stadium, Mualpuiah final luh inchuhin an in nuai dawn a ni.

April 18, Nilaini zanah semifinal thawh hnihna khelh zui leh a ni dawn a, champion lai Hunthar Veng leh TNT, Muanna Veng ten a thiam zawk nih an inchuh leh bawk dawn a ni.

Rinkai an awm
Zanina inkhel tur pahnihte hi kai thar an ni a, mahse Durtlang North chu rinkai zawk ni chungin an inlan ang. Durtlang North hian league match vawi nga an khelh tawhah hnehna an chang vek a, zanina an khingpui tur lakah ngei pawh set hloh loin hnehna an chang thei–an huphurh lo khawp ang.

Season hmasa khan Chhinga Vengin a zawnin match nga an khelhah hnehna an chang a, mah se final-ah Hunthar Veng an hneh lo. Durtlang North tan Chhinga Veng chanchin hi inenfiahna tur darthlalang ṭha tak a ni thei dawn.

Durtlang North hi an coach Malsawmtluanga Ngente hrem a nih avangin captain Jimmy Lalbiakdika'n coach hna a chelh zui, a kaihhruaina hnuaia an match berah an elpui zinga mi TNT an hneh a, inrintawkna an thei thei ang.

Jimmy-a hnuaiah Mizo player-ten inrintawkna an nei a, state pawn aṭanga an lakluh leh an innghahna Nakul Dev langsar tho mah se thawhhona ṭha an lantir tawh. Nakul thlawp tur hian Lalbiakmuana, Zomuanpuia leh Laltlanchhuaha te an pawimawh dawn a ni.

Beisei a awm
Aizawl khaw pawn aṭanga PVL team ni thei hmasa ber Tuichangral hian an league round-ah Durtlang North hneh lo mah se match pathum dangah hnehna an chang thei a, team lian dang barakhaih thei turin theihna an nei tih a chiang.

An intawn hmasak ṭumin Tuichangral hi 25-20, 38-36, 25-17 in an chak lo. Point ringawt en tan chuan inkhel chanchin a hriat kim theih loh. Set hnihna an khelh lai hian vawi 13 zet an deuce! An vanneih ṭum chu ni se la chuan set la thei an ni, set an hloh dang pahnihah pawh an hnufual lutuk bik lo.

Tuichangral hian an khelh dan phungah player rinrawl an nei. Point 224 zet vaw chhuak tawhtu Shivendra chu an innghana tur a ni ang, ani hian a match khelh apiangah point 44.8 zel hlawh chhuak ang a ni a, danglamna siam turin a chungah mawhphurhna a tla ang.

RFL Player of the Night atana thlan ngun ber Shivendra (vawi li) hi league pumpuiah, mimala point hlawh chhuak hnem ber a ni. Danglamna thlen thei a nih rual hian team ṭha an hmachhawn dawn a, tualchhung player ten an puih ṭhat a ngai dawn hle.

Coach Eric Lalsangliana Pautu-in an tlawm tawhna chhanlet ngei a duh dawn a, fimkhur takin a naute a khelhtir dawn tih a chiang. Anastasia leh Chhinga Vengte PVL final khelhpui tawhtu coach hian thil mak thlentir a tum lai hi tualchhung volleyball ngainatute hmuh chak a ni.