Isco goal nen Real Madrid an chak
Real Madrid chuan Pathianni zan khan 2-1 in Malaga an hneh a, Isco chuan a lar chhuahna team lakah goal a khung bakah Casemiro khung tur a siam sak bawk.
Madrid khaw club-in hnehna an chan ve leh tak avangin pathumna aṭangin Valencia chu petchhuahin an awm a, Real-in pathumna dinhmun an luah ve leh ta - season thara Champions League khel turin an dinhmun a ṭha zel.
Hetihlai hian Atletico Madrid chuan hnehna an chang ve bawk a, an mikhual Levante chu 3-0 in an hneh - Fernando Torres chuan goal khat a khung a, Atletico Madrid tan La Liga-a a goal 100-na a ni.
Isco disco
Real Madrid boss Zinedine Zidane-a'n La Liga-ah nomawi an beisei thei tawh lo tih a chiang a, Champions League khel chau zingah Cristiano Ronaldo leh Gareth Bale-te chu a chawlh hahdamtir.
Mahse, Ronaldo leh Bale tel lo pawhin Real-in goal khung turin harsatna an nei lo. Minute 29-na lekah Isco chuan freekick aṭangin goal hmahruai a khung. Malaga hi table mawngphahah an awm mek a, Isco hmelah amah chher liantu 'tlak' theihna goal khungtu nih chu nuam a ti lo tih a lang.
Isco-a'n a team hlui a hmachhawn vang maiin inthlahdah phah nan erawh a hmang lo. Minute 63-naah Casemiro goal khung tur a siamsak leh a, Brazilian midfielder tan thun loha mawi lo khawpa ball duhthusam a ni. Malaga-in hun pek belhah Diego Rolan hmangin goal khat khung ve mah se 'scoreboard' timawitu chauh a ni tawh.
Zidane = 100
Real Madrid-in hnehna an chan chiah khan Zinedine Zidane enkawlna hnuaia inelna hrang hranga match 100 hnehna an channa chiah a ni a, French manager hian heti zat hnehna chang tur hian match 140 bak a mamawh lo - a hnathawh a ropui hle.
Zidane enkawlna hnuaia Real win percentage hi 71.43% a ni a, khawvel manager zingah heti zat win percentage nei thei hi an tam lo - Zidane tan inchhuanna tham a ni. Real-in French legend hnuaia match 140 an khelhah vawi 100 hnehna an chang a, vawi 25 an khingpui inhnehtawkpuiin vawi 15 chiah an la tlawm!
Player a nih laia Real Madrid tana match 247 kheltu manager hian January 2016-a Real a enkawl hnuah Champions League (2), UEFA Super Cup (2), FIFA Club World Cup (2), Spanish La Liga (1) leh Spanish Super Cup (1) nomawi te a chawi tawh a, kuminah Champions League semifinal an lut leh tawh bawk.
Isco faktu Zidane
Malaga khelmualah Isco-a'n mualneitu fan-te lawm a hlawh a, an player hlui hi Malaga fan-ten an la hre reng. Real boss Zidane chuan, "Isco khelh dan khan minti lawm a, team leh ama chungah ka lawm a ni.
"He hmunah hian a seilian a, zahna chibai buk kha a phu takzet a ni. Malaga tana player pawimawh tak a ni ṭhin a, vawiinah erawh kan tan hna ṭha tak min thawh sak ta thung a ni," tiin Real-in Isco an nei thei chu an vanneih thu a sawi.
Hetihlai hian tun season-a league goal nga chiah la khungtu Karim Benzema chu chhan ngaiin a la awm a, Zidane chuan, "Karim hi a beidawng mai lo ang. Tuna a mamawh awmchhun chu goal chauh a ni," tiin French striker chuan goal khung tam lo mah se a khelh ṭhat ṭhin thu sawiin a chhan.
Torress a la chul lo
Atletico Madrid khelmualah Levante an lenglut a, goal thum an chhuah. Atletico goal hmasa pahnih hi Antoine Griezmann leh Angel Correa khung a ni a, minute 58-naa Griezmann thlaktu Torres chuan minute 77-naah a khung ve leh bawk.
Season tawpa Atletico a chhuahsan tur thu puangtu striker tan La Liga bika Atletico tana a goal 100-na a ni a, tun season-a goal riat a khungna chiah a ni nghal bawk. Spanish striker hian Atletico tan inelna hrang hrangah goal 126 a khung tawh.
Atletico Madrid coach Diego Simeone chuan, "Fernando hi he hmunah chuan mi bik a ni a, a goal khung leh khung loh hian a nihna a hril lo. Tun dinhmun thleng tur hian rim takin a thawk a, a thawha a thawhchhuah a ni. Mahse, he hmuna lo kir tura ka sawm khan mi ropui ang ni loa footballer dang ang thoa khel turin ka ngen a ni," tiin Torres chu a chapo loh thu a sawi.