Juve-in nomawi an hnaih
Champions League aṭanga an tlak hnuah Juventus chuan chanchin lawmawm an nei zui ve leh nghal. Pathianni zan Serie A inkhelah Juve hian si thum faiin Sampdoria an hneh a, point rukin hma an hruai fal ta.
Turin-ah Juve lamin inkhel thunun viau mah se goal an khung thei mai bik lo. Minute 43-naah substitute bench aṭangin Douglas Costa a rawn lut a, Brazil international winger hian Mario Mandzukic, Benedikt Howedes leh Sami Khedira te goal khung tur a siamsak vek.
Inkhel dangah champion tum Napoli chu AC Milan nen goal lut loin an inhnehtawk a, Juve tan result ṭha tak a ni. April 21-ah Juventus leh Napoli te an inkhel zui dawn a, Massimiliano Allegri nauten hnehna an chang a nih chuan a zawna a vawi sarih nan league nomawi chawi ngei turin an dinhmun a ṭha tawh hle.
Italian champion hian Champions League nomawi chawi an duh a, mahse tun hnaiah an hlawhtling thei lo. Manager Allegri dinhmun a derthawng nia sawi erawh thu belhchian dawl lo a nih hmel.
Juve manager Allegri chuan, "Nipui bazar a inher chhuah hunah chuan kei chu chawlh hmangin ka kal daih ang, club chungah rinna ka nghat pumhlum a ni, he hmunah hian kum 2020 thleng daih contract ka nei," tiin a hma hunah buaina tur a neih loh thu a sawi.
Sawi zawmin Allegri chuan, "Serie A nomawi kan la chawi lo a, Coppa Italia-ah final khelh a la ngai bawk. Nomawi chawi mai theih tur ṭha tak kan neih hi kan tih hlawhtlin ngei theih nan theihtawp kan chhuah zui dawn a ni," tiin a sawi.