Rajasthan Royals chakna Sanju Samson

Pathianni zan Indian Premier League inkhelah Sanju Samson chuan run 92 ngawt a vaw chhuak a, Rajasthan Royals chu Royal Challengers Bangalore lakah run 19-in hnehna a chanpui.

Bangalore khawpuia inkhelah Rajasthan Royals an bat hmasa zawk a, over 20-ah run 217 siamin wicket li chiah an hloh. Rajasthan tan opener Ajinkya Rahane-a'n (36 runs) bul a ṭan pangngai viau a, run 92 siama a tawp thleng dam Samson a rawn chetpui bawk avangin an dinhmun a him hle.

RCB-in an mualah hnehna chan ngei an duh a, captain Virat Kohli (57 runs) leh Mandeep Singh (47) te rawn che ṭha viau mah se Rajasthan run siam a tam hret a, an tum ram erawh an thleng thei lo - over 20-ah run 198 tlinin wicket ruk an hloh a, run 19-in an tlawm.

Pathianni zan inkhel dangah MS Dhoni-a'n run 79 ngawt vaw chhuak mah se Kings XI Punjab lakah Chennai Super Kings chu hnehna a chanpui zo chuang lo a, run liin an tlawm.

Mualneitu Punjab hi bat hmasa zawkin an che chhe lo. KL Rahul (37 runs) leh Chris Gayle (63) ten pangngai takin bul an rawn ṭan a, over 20 lekah run 197 siamin wicket sarih an hloh.

CSK tana rawn ding chhuak hmasa pahnih Shane Watson (11 runs) leh Murali Vijay (11) te hma takah out nghal mah se Ambati Rayudu (49 runs) pangngai taka a rawn bat hnuah Chennai club-in beiseina an nei thar a, Dhoni-a lan hnuah phei chuan chak turin an inngai hman.

Mahse, CSK-in chak turin run nga chiah an mamawh tawh tihah over 20-a zo a, wicket nga chauh hloh chungin an tlawm a ṭul phah - ball 44 leka run 79 siamtu Dhoni-a'n a ui vawng vawng ang.