Stamford Bridge-ah Man City theihna a lang
Premier League champion Manchester City-in Inrinni zan khan European champion Chelsea lakah inkhel an thunun a, 1-0 in an chak. Stamford Bridge-a an khelh dan aṭanga thlirin Pep Guardiola hote hi an nomawi kawllai kawl chhunzawm turin an ṭha tawk.
Champion tura rinkai pahnih Man City leh Blues te inkhel hian ngaihven a hlawh a, amaherawhchu Tuchel-a hote inven an thlan avangin beisei angin a hmuhnawm ta lo. Inkhela goal awmchhun hi minute 53-naa Gabriel Jesus a khung a ni.
Man City, Chelsea leh Man United ten match ruk khelh zawhah point 13 ṭheuh an hmu a, an chunga awm Liverpool-in point 14 an hmu. Premier League a ngaihnawm chho dawn.
An kim thawkhat
Pep Guardiola-a'n a zawn zata vawi thum a hneh loh Tuchel-a kaihhruai Chelsea hmachhawn turin a player-te an dam ṭha a, Champions League final anga chetsual nawn a tum tawh lo - defensive midfielder pangngai a hmang tawh.
Man City ṭhat dan ber a la hriat loh a, Chelsea laka an bul ṭan dan hi an ṭhat dan ber tih pawhin a sawi theih. Ederson; Kyle Walker, Ruben Dias, Aymeric Laporte, Joao Cancelo; Kevin De Bruyne, Rodri, Phil Foden; Gabriel Jesus, Bernardo Silva, Jack Grealish ten bul an ṭan.
Thomas Tuchel pawhin a duh thala player thlan tur a nei a, Champions League final-a goal awmchhun khungtu Kai Havertz leh defender pawimawh Thiago Silva te bench-ah a dah thei a. Blues tana bul ṭantute chu Edouard Mendy; Cesar Azpilicueta, Andreas Christensen, Antonio Rudiger; Reece James, N'Golo Kante, Jorginho, Mateo Kovacic, Marcos Alonso; Timo Werner leh Romelu Lukaku te an ni.
City an thiam zawk!
Man City hian second half-ah goal an khung chauh a, box chhunga defender Cancelo ball pet chang fuhtu Jesus chuan a ball hmuh chu virpuiin goal-ah a pet a, Chelsea defender-te dan per zarah goal-a ha lut.
Goal luh dan leh goal lut zat thlir chuan Man City hi vannei a tih theih a, amaherawhchu Stamford Brige-a inkhel hmuhnawmah hian chak an phu zawk hrim hrim. Pep-a hote hian na takin pressure an pe a, first half-ah goal a luh loh avangin Chelsea tlarhnung phui chuan fak an phu.
Mahse, inkhel thununtu Man City-in minute 53-naah Jesus hmangin an khung a, goal bakah an khelh dan a lungawi thlak hle. Brazil forward hian first half-ah chance ṭha a hlah a, second half-a goal a khung hnu hian Thiago Silva-a'n goalline aṭangin a dansak.
Pound maktaduai 100 man Grealish-a chevel a hmuhnawm a, English midfielder goal khung tur hi Chelsea keeper Mendy-a'n a dang ṭha takzet. Man City midfield lai luahlumtu Rodri chu danglamna thlentu a ni a, Bernardo Silva-a'n a theihna sanzia a pholang bawk.
Man City tlarhnung awm Aymeric Laporte leh Ruben Dias te an khawng ṭha a, pound maktaduai 97.5m man striker Romelu Lukaku leh Timo Werner te inkawp an dah ṭha. Tuchel-a'n midfield-ah Kante, Jorginho leh Kovacic te a dahlut chungin awmzia a awm pha lo. Stamford Bridge-a an inkhelhna bikah Pep-a hote an chungnung a, chutihrualin season liam ta khan Tuchel-a'n ṭum thum ngawt Man City hi a hneh ve tho tih hriat a ṭha.
Kan chak lo a, City-in chak an phu. Goal luh hma zawng kha chuan tlarhnung lamah kan ding khawng ṭha hle. Thil thleng pakhat khan inkhel a ti danglam a, a pawi ta ni. Kan theihna angin kan khel chhuak thei lo. Ball vawrh kan tum pawhin kan pet dik tawk lo a, chak loh hlauhna kan nei lian a ni. - Thomas Tuchel, Chelsea manager
Thla ruk chhung ni loin tun season chhunga kan khelh ṭhat ber ṭum a ni. Champions League final-a kan chak loh avangin che chhe ta viauah min ngai a, chutiang a ni lo. Kan chet ṭhat avanga Premier League chawi thei leh UCL-a pahnihna ni thei kan ni zawk. Player-te hi season ṭha tak hmang turin an inpeihin ka hria. - Pep Guardiola, Manchester City manager