Joshua a tlawm Usyk-a'n a barakhaih!

Khawvel nghahhlelh heavyweight boxing hmuhnawmah Anthony Joshua chuan unanimous decision-in amah chotu Oleksandr Usyk chu a ngam lo a, Tottenham Hotspur Stadium-a mipui 65,000 pungkhawmten mak tiin an en.

Usyk-a'n round 12 chhungin inhnek a thunun tluan a, judge pathumten 117-112, 116-112, 115-113 a chak zawkah an puang - Ukrainian boxer a chungnung a, endiktute thutlukna sawiseltu an awm lo ang.

Kum 31 mi Joshua hi a career-a vawi hnih a tlawmna chiah a ni a, WBA (Super), IBF, WBO leh IBO heavyweight title a kawl lai chu a chân - contract-ah boxer pahnihte inhnek leh theihna dan a awm a, an intawn leh ngei a rinawm.

Beisei loh result
Joshua hi a tirah WBC champion Tyson Fury nen inhnek tura tih an ni a, mahse, boxer pahnih an inhnek theih tak lohah chuan WBO dan angin Usyk a hmachhawn - chak ngei tura ngaih a ni a, a chak chuan Fury nen an inhnek theih dawn avangin beiseina pawh a sang.

Mahse, round khatna aṭangin rin loh takin Usyk a khel ṭha a, Ukrainian boxer hian skills-ah Joshua a nau en a, British boxer hian kawng tinrengah amah chotu zawk hi a tluk lo a, Usyk-a'n hnek na deuh phei se chuan round 12 a tlin kher lo ang!

Joshua promoter Eddie Hearn chuan, "A mitah hliam a tuar a, round kuanaah kha chuan a hmu ṭha thei tawh lo," tiin Joshua chungchang a sawi a, Joshua chuan, "I hmaah khawvel chu tlusawp vek mah se beidawng suh. London, in chungah ka lawm e," tiin social media lamah a tarlang ve thung.

Joshua a tlawm lo
Vawi 18 fight-a hmachhawna la tlawm lo Usyk hmaah Joshua a tlawm a, Usyk-a hmaa tlawm 19-na a ni chiah. Mahse, British boxer hian lungngaia indawmkun mai a tum loh thu a sawi a, Usyk nen an inhnek leh ngei tur thu a sawi bawk.

Joshua chuan, "Thil thleng tawh ngaihtuaha indawmkun chi ka ni lo a, hun khawhralna mai a ni. Ring chhuahsana, inthlakna pindan lam ka pan lai khan, 'Gym-a kal lehnghal turin ka inpeih a, rim taka thawk turin ka inpeih a ni,' tiin ka inhrilh," a ti.

Vawi 26 fight a hmachhawna a vawi hnih nana tlawm Joshua chuan sawi zawmin, "Inah hawin ka ṭap dawn lo. Hei hi indona a ni a, kawng thui tak a la awm. Fight vawi khat avangin ka chuai ta tihna a ni lo," a ti a, a vaupung a ti na hle.

Joshua kha a chetsual chuan a tlawm thei tih kan hria a, a chesual a, a tlawm ta reng a ni. Usyk kha kan beisei aiin a huaisen a, chak a phu zawk a ni. Tunah chuan Joshua hian Oleksandr Usyk bak a ngaihtuah leh tawh lo ang a, a hneh theih dan tur ringawt a chhut leh tawh ang. Hmasawn zel duha inzir reng peih a ni tlat. - Joshua promoter Eddie Hearn