Football mawina pho chhuaktu Brentford & Liverpool

Brentford khelmualah chak inring chungin Liverpool an lenglut a, point khata lungawi zir chungin an haw thung - Reds-in goal thum lai khung mah se an khingpui team hian heti zat goal tho hi an khung a, 3-3 in an inhnehtawk.

Mualneitu tan Ethan Pinnock chuan goal hmahruai khung mah se Reds-in Diogo Jota leh Mohamed Salah hmangin an chhanglet a, Vitaly Janelt chuan tlawm bik duh loin Brentford tan a sut ve leh.

Liverpool tan Curtis Jones-a'n goal khung leh mah se Yoane Wissa chuan a rawn khung ve leh a, hun tawp thlenga goal dang lut loin team pahnihin point khat ve ve an hmu.

Chelsea an tlawm avangin Liverpool-in point 14 nen hma an hruai mek a, zanin inkhela Brighton & Hove Albion-in hnehna an chan chuan rin loh takin Premier League hmahruaitu an ni daih ang!

Inkhel hmuhnawm chu
Inkhel ṭantir aṭangin ennawm ropui hmuh tur a awm nghal a, goal line aṭangin team pahnihin goal tur an pet chhuak ve ve - Salah-a'n hma takah goal a khung dawn emaw tih laiin Kristoffer Ajer-a'n a pet chhuak hman a, Brentford an vannei takzet.

Mualneitu an tawm reng bik lo. Huaisen takin Liverpool an nawr a, Bryan Mbeumo khung tur nia lang chu Joel Matip chuan goal line aṭang vekin a lo pet chhuak ve hman a, Liverpool ṭantute thin phu a rang ve thung.

Brentford tan Ivan Toney leh Frank Onyeka ten chance duhawm an nei bawk a, an goal hmahruaitu erawh rin loh lam aṭangin a ni - minute 27-na lekah defender Ethan Pinnock chuan goal hmahruai a rawn khung.

Mahse, Brentford an au rei lo - minute li a liam chauh tihin Jota chuan si phurh a rawn sut a, goal dang lut loin chawlhlawk hman a ni.

Salah 100
Second half-ah Salah a vanduai reng lo - Egyptian forward hian Premier League match 150-a Liverpool tana a goal 100-na a rawn khung a, Reds tana league-a goal 100 khung tling thei 13-na a ni a, Premier League bikah chuan Robbie Fowler, Steven Gerrard leh Michael Owen te huangah a hming a nem kai ve chiah.

Salah-a'n Liverpool chanchina league goal 100 khung tling tura match mamawh tlem ber record a siam a, Premier League bikah chuan Alan Shearer (Blackburn, 124 games), Harry Kane (Tottenham, 138) leh Sergio Aguero (Man City, 147) chiah a tluk lo - goal 101-na khungna remchang a nei zui a, hnai tak aṭangin a pet over thung.

A la tawp mai lo - Brentford-in minute 63-naah Janelt hmangin si phurh an rawn sut a, Jones chuan minute li hnuah Reds tan a rawn khung ve leh! Point thum nen Liverpool an haw mai dawna a lan hnuah Brentford-in ngaihdan dang an nei a, Wissa hmanga minute 82-naa si phurh sutin team pahnih an inhnehtawk.

Brentford manager Thomas Frank chuan, "Europe-a team ṭha ber pawl nen kan intiat tawk reng a ni," tiin a naute a chhuan thu a sawi a, Liverpool boss Jurgen Klopp chuan, "Hmuhnawm tia sawi chu ka tan a rem lo mai thei a, mahse football diktak a ni. Brentford-in ṭha taka an khelh avangin point hmuh an phu tih sawi hi ka inthlahrung lo," tiin a sawi