Andrew Wiggins dilna an hnawl

Golden State Warriors player pawimawh Andrew Wiggins chuan sakhuana lam thil vangin Covid-19 vaccine lak loh a dil a, mahse basketball inelna sang NBA thuneitu lam chuan an pawmsak lo.

NBA hian an player zawng zawngin vaccine an lak ngei ngei kher ngai a ti lem lo. Mahse, team awmna khawpui thuneitu lamin inkaihhruaina an siam chu an zawmsak zel a ngai - Wiggins hian invenna a la lo a nih chuan GSW tan home match a khel thei lo ang.

San Francisco thuneitu lamin an khawpui chhunga mi kum 12 chung lam, a bik takin mipui punkhawmna hmuna kal ṭhinte chuan vaccine an la ngei tur a ni, an ti. Hetiang a nih chuan he khawpui behchhana team awm player zawng zawngin invenna an lak a ngai dawn.

Basketball inelna sang berah hian Warriors chuan season tharah home match vawi 41 an khel dawn, season hmasa lama chawh ruala point 18.6 zel neitu Wiggins hi an chhawr thei lo a nih chuan channa lian tak a ni ang.

GSW hian October 5 aṭangin pre season an khel ṭan tawh dawn.