Fernandes-a'n penalty a pet goal lo

Manchester United-in Inrinni zan khan Aston Villa 1-0 in an hneh lo a, injury time-ah Cristiano Ronaldo aia penalty pettu Bruno Fernandes chuan a pet over. Kum 12 hnuah Villa-in Old Trafford-ah hnehna an chang a, goal awmchhun hi Kortney Hause-a'n minute 88-naa a khung a ni.

Che ṭha zawk Villa
Manchester United-in Champions League-ah Young Boys an hneh lo a, London Stadium-a an hneh hram West Ham chu League Cup third round-ah hneh loin an tla. Aston Villa nen hian insiamṭhat tumin Ole Gunnar Solskjaer-a'n Cristiano Ronaldo leh player ṭha dang luhtir mah se awmzia a awm pha lo.

Old Trafford-ah Villa an khel ṭha zawk. Matt Targett-a'n hnai tak aṭangin goal ruakah a pet over, Harry Maguire back pass ṭha tawk loh vanga David de Gea pet chhuah sual chu Ollie Watkins zawnah chiah tla mah se Villa forward hian Spanish keeper zawnah a pet.

Second half-ah pawh Ezri Konsa-a'n a hun ṭha neih chu goal zawnah a tauh thei lo a, Watkins-a ball pet De Gea-a'n a dansak. Substitute Emi Buendia pass chu Cameron Archer tan chance ṭha bik ni mah se a tawlhthlu.

Minute 88-naah Villa-in goal an khung ta tho a, Douglas Luiz-a corner pet chu Hause-a'n ṭha zetin a tauh lut. Mikhual team hian goal khung an phu nachungin De Gea tibuaitu Watkins a offside avangin goal-a pawm loh theih a ni a, mahse match official-in thil thleng hi an hmuh hmaih.

Beisei pha lo United
Man United-in bul an ṭan chhe lo a, Fernandes-a'n chance ṭha a hlah. Amaherawhchu mualneitu lam hian inkhel an thunun thei lo a, an tlarhnung a phui lo. Inhliam vangin minute 34-naah Luke Shaw chu Diogo Dalot-a'n a thlak a, minute 66-naah Harry Maguire aiah Victor Lindelof te an lut. Chutihrualin English defender ṭha pahnih awm lai hian Man United tlarhnung a phui chuang lo.

Rawlthar duhawm Mason Greenwood-a'n a theihna sang tak hmangin chance ṭha ṭum khat aia tam a insiam a, mahse Greenwood hian dinhmun ṭha zawka ding Fernandes leh Ronaldo te a pek theih loh avangin dem a hlawh.

Solskjaer-a nauten beisei an pha lo a, chutichung chuan injury time-ah ball-in Hause a kut a per a, referee Mike Dean-a'n penalty a pe. Ronaldo aiah Fernandes-a'n ball a keng a, Villa keeper Emiliano Martinez chuan rilru chhaih buai nan, "Ronaldo, pet ta che," tiin a au buai.

Injury time a nih tawh avangin pressure a tam sa a, Martinez ṭawngkam avangin Fernandes-a'n pressure a neih belh. Portuguese midfielder hian na takin a pet over a, Old Trafford-ah match zawnin Man United an tlawm. Ole hote hian September 29, Nilaini zan hian Europa League final-a an hneh loh Villarreal chu Champions League-ah an mikhual ang.

Engtin zel?
Inkhelh banah Ole Gunnar Solskjaer chuan, "Goal ṭha a nih chuan kan pawm mai a, mahse kan lama goal kha chu offside a ni. Hause-a'n a tauh luh khan Watkins khan De Gea kha a tibuai a ni," tiin a sawi.

Goal chu eng pawh ni se, Man United-in penalty pettu thar an neih a rinawm. Bruno Fernandes-a'n February 1, 2020 khan English club hi a zawm a, vawi 23 petin goal 21 a khung. Hemi hun chhung hian Ronaldo chuan penalty vawi 22 petin vawi 18 a khung thung.

Aston Villa lakah Fernandes-a'n a hlah takah chuan Man United tana penalty pettu tur chu Ronaldo ni turah a ngaih theih. Chutihrualin Man United buaina tak hi penalty pettu lam a ni lo a, nomawi duhin sum an hmang tam. Norwegian manager hi nomawi lakpui tura a ṭha tawk lo a nih chuan an ban hreh lo ang.