AC Milan tana goal khungtu Maldini Inter Milan leh Atalanta inhnehtawk

A pu leh a pa hnung zuiin Daniel Maldini chuan AC Milan tan goal a khung. Daniel hi Milan legend Paolo Maldini-a fapa a ni a, a pu pawh Milan tana goal khung tawh Cesare Maldini a ni bawk - an thlah chhawng pathumin Milan tana khelin goal an khung vek. Inrinni zan khan AC Milan-in Alberto Picco khelmualah Spezia 2-1 in an hneh a, Daniel-a goal khung lai hi a pa Paolo Maldini-a'n a en.

Goal khungtu Maldini
Football ngainatute zingah Paolo Maldini hming inzawh nawn a ngai lo, a bikin Italian defending ngaina tute tan chuan Maldini hi player ropui bik a ni a, a fapa Daniel Maldini erawh attacking midfielder a ni thung.

Kum 19 mi Daniel-a'n a vawi khat nan Milan tan Serie A-ah inkhel bul a ṭan, second half minute 48-naah goal hmahruai a tauh lut. Spezia lamin Daniele Verde hmangin sut mah se, hun tawp hma deuhin Brahim Diaz-a'n Milan 2-1 a chakna goal a khung.

Maldini hian a pa in Milan tana goal a khung aṭanga kum 13 leh ni 179 a liam hnuah a khung ve leh chiah a, a pu in Milan tana goal a khung hnuhnun ber aṭanga chhut chuan kum 60 leh ni 22 a liam chiah - an in chhun pafa hlawm hle.

Thurawn ka chhawr
Football chhungkua aṭanga seilian a ni bawk a, a pa leh a pu ten thil tam tak an zingtirin an fuih ang tih a chiang. Maldini hian inkhelhna hmun siamsaktu coach Stefano Pioli fak nachang a hre nghal, a khelh theih chhan tih a hmu thiam.

Maldini chuan, "Match khelh hma niin inkhel bul ṭantu zinga ka tel tur thu min hrilh a, a nuamin rilru pawh a zauthau duh ngei mai. Tawnhriat la nei tam lo mah ila ka ṭhianten min thlawp ṭha em em a, coach Pioli hnen aṭanga thurawn leh tih tur tam tak ka dawn ten min pui nasa," a ti.

Hnehna an chan avangin Milan hian league match ruk aṭangin point 16 an hmu a, table hmahruaitu an ni. Match nga chak zawn tawh Napoli chuan nizan khan Cagliari an mikhual a, result a zirin hmahruaitu hi a la inthlak leh thei ang.

Inter an chelh
Inrinni zan inkhel dangah Serie A champion lai Inter Milan chu an mikhual Atalanta nen 2-2 in an inhnehtawk. Nerazzurri hi San Siro bika league match 18 an chak zawn tawh chu tihtawpsak an ni.

Goal hmahruai an khung hnuah si an phur let a, hun tawp dawnah penalty an hlah bawk - Inter Milan an vannei tawk lo. Inter manager Simone Inzaghi chuan an mikhual Atalanta aia chak phu zawk an nih thu a sawi.

Antonio Conte-a'n team nghet tak a din a, season hmasa aṭang khan San Siro-a league match an khelhah Inter hi an chak zel; manager thar Inzaghi pawhin chhawm nungin vawi 18 an chak zawn, mahse tunaah chuan an record hi thaichhiat a ni ta.

Minute ngana leka Lautaro Martinez goal khung chu mikhual lamin Ruslan Malinovskyi leh Rafael Toloi te hmangin an chhanglet. Striker Edin Dzeko-a'n sut ve leh mah se, hun tawp dawna an penalty hmuh chu Federico Dimarco-a'n petin bar a tih per.

Eng nge an sawi?
Inter Milan coach Simone Inzaghi chuan, "Inkhel entute chuan hmuhnawm an tih ngei ka beisei, a tawpa hun remchang ṭha bik kan hloh kha a pawi, penalty kan hlah khan hun la tawp lo mah se kan tha a zawi vek ni berin a lang," a ti.

Atalanta manager Gian Piero Gasperini erawhin ngaihdan dang a nei thung. Chak an tum thu sawiin, "Penalty kan chawi a, kan goal khung pawm a ni lo bawk. Team pahnih khan hun ṭha kan insiam hnem hle. Chak tum ni mah ila point khatah lungawi a ngai," tiin a sawi ve thung.

Tun hnai season thum chhung chu Atalanta hi Serie A team zinga goal khung hnem ber an ni. Attacking game an khelh miau avangin goal pawh an chhuah nual zel, mahse manager Gasperini enkawlna hnuaiah rei lote chhungin nasa takin hma an rawn dawn a ni.