Player 10 Bayern chak laiin Dortmund chak lo
Bayern Munich chuan player 10 a khel chungin Greuther Furth chu 3-1 in an la hneh thei tho a, inkhel dangah Borussia Dortmund pawh an player pakhat hnawhchhuah niin Borussia Moncheng-ladbach lakah 1-0 in an tlawm thung.
Bayern an ṭha
Zirtawpni zanah German champion Bayern an inlan a, minute 48-naah defender Benjamin Pavard hnawh chhuah ni mah se an buai phah lo. Bavarians hian player 11 an nih laiin Thomas Muller leh Joshua Kimmich te hmangin goal khat an nei hman.
Pavard awm loh hnuah pawh goal an nawr ngam a, midfielder Sebastian Griesbeck-a'n anmahni lamah ti lutin, hun tawp dawna Cedric Itten goal khungin awmzia a nei phak tawh lo.
Bayern an chak lai hian an goal khung khawl Robert Lewandowski-a'n goal a khung lo, a zawna league match 15 zet a khung hnuah a khung ta lo, record dinglai Gerd Muller (16 match) tluk pha turin a bul aṭanga a ṭan leh a ngai dawn.
Julian Nagelsmann-a naute hian tun hnaiah a zawnin inelna hrang hrangah match ruk hnehna an chang ta. Nilaini zanah Champions League group match khel turin Allianz Arena-ah Dynamo Kiev an mikhual zui leh ang.
Dortmund an tlawm
Beisei han nei sang viau ṭhin mah se Borussia Dortmund an chesual leh khut ṭhin. Borussia Monchengladbach lamin Denis Zakaria hmanga goal an khung hnu lawkah, mikhual midfielder Mahmoud Dahoud chu hnawh chhuah niin a chhanletna goal an nei lo.
Switzerland mid-fielder Zakaria hian Matthias Ginter nen mawi taka an in one-two hnuah goal awmchhun hi a khung. Dortmund hian goal thung thei bik striker Erling Braut Haaland leh captain Marco Reus te hliam vangin an chhawr thei lo a, goal hmaah an hriam tawk lo a ni.
Dortmund hian goal khung loh an nei khat hle. 2020 September 20 khan Augsburg chu 2-0 in an hneh lo, a hnu lamah match 56 chhung zet chu goal an khung char char, an goal khung tluang lai hi tunah chuan a tawp.
Marco Rose naute an chak loh laiin an elpui club dang an chak a, match ruk aṭanga point 12 hmuin Dortmund hi Bundesliga table-ah palina an ni. Champion lai leh hmahruai mektu Bayern nen an inkarah point li a awm leh tawh avangin nomawi chawi a harsa dawn.