PSG an la chak vek

Lionel Messi leh Gianluigi Donnarumma te inlan lo mah se Paris St-Germain tan buaina tur a awm lo. PSG hian an mikhual Montpellier chu 2-0 in an hneh a, tun season Ligue 1 match riat an khelh tawhah la chak vekin hma an hruai fal.

Paris club tan hian Idrissa Gueye chuan Angel di Maria siamsak a khung a, substitute Julian Draxler pawhin Neymar siamsak a khung bawk - khelmuala hmuhnawm erawh Kylian Mbappe leh Achraf Hakimi te inthlawp a ni.

Inter Milan champion puitu Hakimi hian goal venhim bakah a nawr kawngah a thawh hlawk a, mual sira player tlan chak Mbappe nen an inkawp chu Montpellier tlarhnung hoin an chelh lo hle, goal khung lo mah se an hlauhawm tluan chhuak zak.

Mauricio Pochettino-a'n hliam vangin Messi a chhawr lo a, keeper Donnarumma erawhin awlsam takin Keylor Navas a nek chhuak mai dawn bik lo niin a lang, an inkhelh chhawk rih dawn a nih hmel.

PSG hian Thawhlehni zanah Champions League khel turin Manchester City an mikhual zui dawn a, beiseina sang taka nena an lakluh Messi a inlan thei dawn em tih a la chiang lo.