A vawi khat nan Atletico an tlawm

Tun season-a a vawi khat nan Atletico Madrid an tlawm a, La Liga a ngaihnawm zual sawt - khualmualah Alaves an ngam lo a, inkhela goal awmchhun hi Victor Laguardia-a'n minute lina leka a khung a ni.

Kum 31 mi Laguardia hi Alaves tan chuan chhandamtu a ni. Spanish centre back hian goal a khung bakah second half-a Rodrigo de Paul-a 'cross-shot' chu goal line aṭangin a pet chhuak bawk - tun season-ah a vawi khat nan an chak!

Alaves-in 29% lek ball an chang chungin vanneih vang chauha chaka puh erawh a rem bik lo a, Mamadou Loum leh Tomas Pina ten chance duhawm tak an neih kha khung ngat se Atletico chu mualpho lehzuala haw thei an ni.

Hun tawp hnaih lamah Atletico-in na takin an nawr zui a, Angel Correa-a'n angle chep tak kar aṭanga a pet, Alaves goalkeeper Fernando Pacheco-a'n a dante chu uiawm tak a ni - Marcos Llorente leh Luis Suarez ten an chance neih an chhawr lo bawk.

Atletico coach Diego Simeone chuan, "Hmasawn kan mamawh a, kan khelh ṭhat ṭhin kan chhunzawm a ngai bawk. Kan khingpuiten goal ven ringawt an ngaihtuah chuan a harsa ṭhin a, keinin a ṭhiat turin speed leh skills kan nei bawk si lo.

"Kan tana pawimawh ber chu hmasawna insiamṭhat a ni a, theihtawp kan chhuah reng avangin kawng dik kan zawh mekah pawh ka ngai," tiin a sawi.