Real-in goal an khung lo!

Atletico Madrid tlawm thu hre sain Real Madrid an inlan a, an mikhual Villarreal lakah goal an khung bik loh avangin point khatah lungawi an zir a ṭul.

Real-in hnehna chang zo lo mah se table-ah erawh hma an hruai chhunzawm zel a, league match sarih an khelh tawhah tlawm nei loin point 17 an nei mek - anmahni hnaih bertu Sevilla aiin point thumin an sang zawk.

Sevilla hian Youssef En-Nesyri leh Rafa Mir goal hmangin Espanyol chu 2-0 in an hneh a, Thomas Delaney hnawhchhuah ni mah se an tuar lo - league match ruk khelhah an la tlawm lo a, Real aiin match khatin an khel tlem.

Carlo Ancelotti kaihhruaina hnuaiah Real Madrid-in harhtharna an chang thar a, Villarreal an hmachhawn hma hian league match ruk chhungin goal 21 ngawt an khung.

Mahse, Inrinni zan inkhelah erawh Real-in goal khung an harsat a, Karim Benzema leh Isco hmanga an chance neih chu Villarreal keeper Geronimo Rulli tan hna awmchhun a ni.

Villarreal tan Arnaut Danjuma chuan chance duhawm nei mah se Thibaut Courtois chuan vawi hnih ngawt ṭha zetin a dansak a, team pahnihin chak zawk nih an phu lo ve ve - a tawpah point an insem.

Ancelotti hi season ṭan dawn khan a club hlui Real Madrid hian Everton aṭangin an thlem lut a, Real a lo enkawl hmasak tawh nena chhiar telin La Liga match 83-ah a kaihruai tawh - tun hi goal khung loa draw result a neihpui hmasa ber a ni.

Arsenal coach hlui Unai Emery enkawl Villarreal hi league match ruk an khelhah la tlawm lo mah se table-ah 10-na an ni mek a, league match rukah vawi nga chu an khingpuite an inhnehtawkpui!

Nizan khan league match nga an khelha vawi hnih chiah la chak Barcelona an inlan a, Levante an mikhual - he thu buatsaih a nih lai hian result kan hre hman lo.