Zaninah United-in insiamthat an tum
Manchester United-in derby-a an hmelma an hneh zawhah West Bromwich Albion an hneh lo a, zanin dar 12:15 hian Dean Court-ah insiamṭhat tumin Bournemouth an tlawh dawn.
Portuguese manager Jose Mourinho chuan a player-te a vau lawk a, Cherries nena khel ṭha tan Inrinni zana Tottenham Hotspur nen Wembley Stadium-a FA Cup semifinal an khelh hunah khelhna hmun a awm tur thu a sawi bawk.
Baggies hneh lotu
Old Trafford-ah United tan table mawngphaha awm Baggies hneh a harsat a rinawm lo a, derby-a chak hlim an nih avangin beisei a sang lehzual. Amaherawhchu mikhual team hian Jay Rodriquez-a hmangin United hi 1-0 in an hneh a, Manchester City an champion phah bawk.
West Brom hian Old Trafford-a United an hneh chungin match li khelh hmabakah point 24 chauh an la hmuh avangin season tharah an inlan zel a rinawm tawh lo a, sum ṭhahnem tak hmang chunga he team hneh lotu United an mualpho.
Mourinho chuan, "City kan hneh zawha kan khelh dan a thinrim thlak a, football hriatthiam har zia a lang. Kei chuan league nomawi pariat ka chawi tawh avangin Manchester City kan hneh avangin ka lawm uchuak lo. Mi ṭhahnem tak erawh derby-a chak avanga lawm uchuak ka hmu a, City kan khelh leh Baggies kan khelh dana kan rilru puthmang danglamna a hmuh theih a ni," tiin an naute awm danah a lawm lo hle.
A nghawng
Tun season-ah Mourinho hoten nomawi an la chawi lo a, an lak theih awmchhun chu FA Cup chiah a ni ta. Kartawp hian Wembley stadium-ah Spurs nen semifinal an khel dawn a, Baggies hi hneh se chuan zanin inkhel hi indahṭhat hun chiah a ni a. An hneh tak loah chuan Portuguese manager chuan FA Cup semifinal khel tur thlan nan a hmang hlauh dawn.
Portuguese manager Mourinho chuan, "Cherries nena khel te hi midang an hahdam theih nana lut an ni dawn lo a, an khel ṭha a nih phawt chuan FA Cup semifinal an khel ang a, West Brom nena khel player ṭhenkhat an awl thung ang," tiin Baggies nena khel ṭhenkhat chu hrem nan awltir a tum thu a sawi.
United player zinga manto ber Paul Pogba chuan derby-ah goal hnih khung mah se West Brom nen erawh minute 58-naah lakchhuah a ni a, Ander Herrera pawh halftime-ah lakchhuah a ni a, manager-in an khelh ṭhat tawk loh thu inkhelh banah a sawi.
Mourinho chuan, "Manager-in engtin nge team a thlan ṭhin? Kei chuan tih dan ṭhin pakhat ka nei a, an khelh dan aṭangin ka thlang mai ṭhin. Engtinnge thlang se min duh, an man aṭangin nge? an hlawh aṭangin nge? an hmelṭhat dan a zirin? Ka ngaihdan thlak ka tum lo a, an khelh dan aṭangin ka thlang ang," tiin a sawi a, French midfielder Pogba pawh a lan dan chuan semifinal-a inkhel bul ṭan lo zingah a tel tihna a ni.
Mourinho a inhrosa
Manchester United manager Mourinho chuan, "Ka thawh danah hian ka chiang a, rin loh chhan tur pawh ka nei lo. Premier League nomawi ka chawi hnuhnun ber kha kum 20 liam ta a ni lo a, kum thum liam ta chauh kha a ni. Champion dan ka hria a, ka inringtawk," tiin rin ngam manager a nih thu a sawi.
An hmelma City chunga an awm leh theih dan tur sawi zuiin Mourinho chuan, "Khelh ṭhat leh ṭhat loh a inchhawk zut chuan a champion theih loh. Chutiang bawkin champion tur chuan player neih ṭhat a ngai a, neih ṭhat loh chuan champion ngaihna a awm lo. Hei bak hian khelh ṭhat tluan a ngai a, tuna kan mamawh chu khelh ṭhat tluan hi a ni," tiin a sawi a, zanin hi insiamṭhatna hun ṭha a ni.
Nizan khan FA Cup semifinal-a United khingpui tur Spurs chuan Brighton & Hove Albion FC an hmachhawn a, Mourinho hote aiin ni khatin hahchawlhna hun an ngah ang.