De Bruyne-a'n beisei nei sang

Premier League champion Manchester City midfielder Kevin De Bruyne chuan, manager Pep Guardiola kaihhruaina hnuaiah vanglai hun an hman chhoh theih a beisei thu a sawi.

Man City hi league match nga khelh hmabak nei chungin an champion thei. Pep-a'n Etihad Stadium-a a season hnihnaah EPL bakah League Cup nomawi a chawi bawk a, Champions League leh FA Cup-ah beisei phak lo mah se khelmual chhunga a naute khelh dan chu an elpui club dangte chung en a ni.

Belgium midfielder De Bruyne chuan, "Mi zawng zawngin khawvela manager ṭha berte zinga mi a ni tih an hria. He hmunah hian kum hnih liam ta khan a rawn kal a, kan khelh dan kalphung thlakin, hmasawnna nasa tak a rawn thlen. A ruala hlawhtlinna changtu zinga ka tel hi ka lawm a, kan thawhrim rah chu a rawn lang chhuak mek," a ti.

Spanish manager Guardiola-a'n transfer laiin sum tam tak sengin player a lei khawm ṭhin a, a player lakluhte hi vanglai hmang chho mek tur an nih avangin City pawhin nomawi lian dang an beisei zel thei ang.

Kum 26 mi De Bruyne chuan, "Player rawn lut tharte hi inrualkhat tak tak an ni zel a, hmasawnna tur pawh kan nei ṭheuh. Pep hian thawhhona ṭha a din a, hma kan sawn zel a nih chuan hlawhtlinna dang pawh kan chan chhunzawm ka beisei," tiin a sawi.