Bul ṭan fuh Novak Djokovic

Novak Djokovic chuan player dangte tan namnul mai theih a la nih bik loh zia a lantir leh ta. Thawṭanni zan khan Djokovic hian Dusan Lajovic hnehin Monte Carlo Masters first round a paltlang.

Court Rainier III, Monte Carlo Country Club-a inkhelah Djokovic-a'n a khingpui lakah zahngaihna a lantir lo. Minute 56 chhung lekin 6-0, 6-1 in hnehna a chang thei a, tun hnaia boruak ṭha nei hlei thei lo Serbian tlangval tan game khat chiah hloh chunga hnehna chan hi chanchin lawmawm a ni.

World number 1 hlui Djokovic hi tun hnaiah a coach Andre Agassi nen an inṭhen a, tun hma lama a lo thawhpui tawh ṭhin Marian Vajda nen training an nei dun leh mek tawh. A kiu hliam a dam fel tawh a, vawiin tlaia Borna Coric nen an inkhelh leh hunah pawh rinkai zawk a ni leh ang.

Kum 30 mi Djokovic hian tun season-a Grand Slam hmasa ber Australian Open-ah beisei a phak lo a, Indian Wells leh Miami Masters-ah te Taro Daniel leh Benoit Paire hneh loin a tla nghal bawk; tun season ATP Tour neih tawh zinga a bul ṭan ṭhat ber ṭum a tawng a ni.

World number 13 nilai Djokovic chuan, "Rei tak ka inkhelh loh hnuah ṭha takin ka inlan thei a, ka tan chuan bul ṭanna duhawm tak a ni. Ka kiu hliam zai a ni a, a nihna takah chuan kum khat chuang hnuah na nei loin ka inkhel ve leh chiah a ni," tiin a sawi.

Monte Carlo Masters vawi hnih champion tawh Djokovic hi a chak chho zel a nih chuan quarterfinal-ah Rafael Nadal nen an inkhel dawn. World number 1 leh champion lai ni bawk Nadal hi first round-ah a bye a, vawiin tlai hian Aljaz Bedene nen an intawng ang.

Inkhel dangah Kei Nishikori chuan fiahna hautak a paltlang nghal. Japan tlangval hian seeded 12-na Tomas Berdych lakah set hmasa ber hloh zet mah se 4-6, 6-2, 6-1 in hnehna a chhang let thei.

World number 4 hlui Nishikori hi a banrek hliam vangin season hmasa chawhnu lam zawng a inkhel thei lo a, tun dinhmunah world ranking lamah pawh 36-naah a tlahniam hman a ni. Tun hnai kum ruk chhunga a vawi khat nan Monte Carlo-ah a inlan a, a match lehpekah chuan Russian rawlthar Daniil Medvedev nen an intawng dawn.