Indian Super Cup final-ah Bengaluru FC Bagan ngam loh Miku
Indian Super Cup final-a East Bengal hmachhawn tur chu Bengaluru FC an ni - Nimin khan semifinal-ah Bengaluru hian 4-2 in Mohun Bagan an hneh a, Bangalore club tan Miku chuan hattrick a siam.
Super Cup final hi April 20-ah khelh a ni dawn a, FC Goa hnehtu East Bengal leh Bengaluru ten champion an inchuh dawn - mi tam tak nghahhlelh Kolkata derby kan hmu dawn ta lo.
Akram lansarhna
Super Cup khelhna Bhubaneshwar-ah khua a lum a, 39 degree celcius lai a nih avangin team pahnih player an hmuhnawm tawk lo. Bagan tan Nikhil Kadam-a'n chance ṭha a khawhral a, Blues tan Boithang Haokip chuan Miku hnen aṭanga a ball hmuh ṭhat chu goal-ah a chantir thei bik lo.
Bagan tan Akram Moghrabi chu player langsar a ni a, Bengaluru player-ten an chelh meuh lo. Lebanon international hian minute 42-naah mawi zeta ball lain Aser Pierrick Dipanda tan a siam sak a, I League top scorer tan khung lohna chi a ni lo - Moghrabi hian hemi hnu lawkah hian chance duhawm a hlah.
A thawh hnihna
Blues manager Albert Roca-a'n a naute fuihna thu a sawi ṭha tih a hriat a, chawlhlawk hman a nih hnuah Bengaluru an nung sawt. Nishu Kumar chuan hun ṭha nei nghalin shot erawh a nei ṭha tawk lo. Bengaluru-in an nawr nat vanglai takin Bagan-in an nawr let thut a, Nikhil Kadam um pha lotu Nishu-a'n Bagan midfielder a pawh tluk avangin red card a chawi.
Player kim lo an nih avangin Bengaluru an hnual phah lo. Goal an nawr chhunzawm a, Chhetri-a'n a chance ṭha a hlah zui. India captain goal khung loh hnuah Miku-a'n penalty beisei mah se referee nen an ngaihdan a in ang lo.
Hei le Miku
Bagan-in 1-0 in hma an hruai a, minute 50-na aṭangin player pakhata an tam zawk bawk avangin chak tur chianga dah an ni. Mahse, Bengaluru tlarhma nawr na tak karah Kolkata club tlarhnung an talbuai a, Miku chuan minute nga chhung lekin goal hnih a rawn khung!
Blues-in hma an hruai a, an duhtawk lo. Udanta Singh tih tluk a nih hnuah penalty an hlawh chhuak a, Bengaluru tana pettu 'regular' Chhetri-a'n duhsak takin Miku a pe a, Venezuela international hian a hattrick siam nan a khung. Hun pek belhah Chhetri-a'n a khung ve leh a, Bagan-in Dicka hmangin goal khat dang khung leh mah se mualpho zualpui khuhna chauh a ni tawh.]
ISL vs I League
India ramah football league pahnih a awm a, sum tamna zawk ISL lamin player an nei ṭha zawk a, an foreigner-te phei chu langsar tak tak an ni. I League-in ISL lak bang an khawm a, foreigner pawh an class a sang lem lo a; nimahsela Indian Super Cup-ah league pahnih intluk tlan zia a lang.