Goal khung thiam Liverpool; Arsenal beisei a tawp

Premier League-ah Manchester City champion chiang tawh mah se English football-a league sang ber chanchin ngaihnawmna a la reh chuang lo.

Liverpool-in season thara Champions
League khelh an tumna an la chhawm nung ve reng a, Manchester United-in West Brom an hneh loh avangin 'United chunga awm' chu beisei an neih tharna tur a ni leh ta bawk.

Arsenal erawh khualmualah a zawna league match nga chhung an tlawm tak avangin season thara Champions League khel tur chuan Europa League lama insawrbing a fuh tawh zawkin a rinawm a, Chelsea-in hnehna an chan laia Tottenham Hotspur an tlawm avangin Blues beiseina thi ṭep tawh chu chhem nun tharin a awm ve leh ta bawk.

Liverpool & Goal
October 2015-a Jurgen Klopp-a'n Liverpool a enkawl hnuah Reds-in attacking football hmuhnawm tak an pholang ṭhin a, kartawpah khan Bournemouth chu 3-0 a sawp lehin German coach enkawlna hnuaiah match 148 aṭangin goal 300 ngawt an khung ta.

Tun season ringawtah Liverpool-in goal 121 an khung tawh a, goal 82 chu tlarhmaa Reds player inkawp Mohamed Salah, Roberto Firmino leh Sadio Mane ten an khung a ni. Klopp chuan, "Heti zat goal khung chu ropui tak a ni a, a pawimawh ber erawh kan chhunzawm zel hi a ni," a ti.

Klopp enkawlna hnuaiah Liverpool hian match 148 aṭangin vawi 79 hnehna changin an chak zat percentage chu 53% a ni a, kum 15 liam ta chhunga Reds boss Roy Hodgson, Kenny Dalglish, Brendan Rodgers leh Rafael Benitez te zingah 55% neitu Benitez chiah hi Klopp-a'n a phak rih lo.

Egyptian King
Mohamed Salah-a'n Liverpool a pan hnuah goal hmangin fan-te thinlung a luah nghal a, Bournemouth an hnehna inkhelah goal khat khung lehin league-ah ringawt goal 30 a khung tawh–Premier League season khata goal 30 khung tling thei pariatna a ni.

Hei mai hi a ni lo, Salah hi African player zinga Premier League-a season khata goal khung hnem thei ber a ni a, Chelsea striker Didier Drogba-a'n 2009-10 season-a goal 29 khunga record a lo siam tawh chu a khum–inelna hrang hrangah goal 40 a khung tawh bawk. Liverpool player zingah season khata goal 40 khung tling thei pathumna niin Roger Hunt (1961-62) leh Ian Rush (1983-84, 1986-87) te huangah a awm.

Kum 25 mi forward hian goal 40 khung turin match 45 a mamawh a, khelmualah minute 3,577 hun hmangin minute 89 dana goal khung ziah ang niin assist vawi 11 a nei–season khata Liverpool tana khung hnem ber Rush (47 goals) record nihrual theihna chance a nei sang hle.

Salah chauh lo pawh...
Liverpool leh goal chungchang sawi a nihin Salah hming lo lang nghal ṭhin mah se Mane leh Firmino sawi bo reng theih an ni bik lo. Mane-a'n inelna hrang hrangah goal 17 khung tawhin league bikah goal 10 a khung tawh a, 2014-15 season-a Premier League a pan hnuah league-ah goal 44 khungin Senegalese player zinga Premeir League goal khung hnem ber ni turin Demba Ba (43) a khum.

Premier League-a season an hman zawng zawnga season tina goal 10 khung tling ziah thei player pahnih Sergio Aguero (season sarih) leh Eric Cantona (panga) te chiah an la awm a, tun dinhmuna a khelh dan en chuan Mane (season li) hian United legend Cantona a la khum a nih pawhin a mak lo ang.

Firmino-a'n Liverpool a pan hnua league-a a goal khung hnem ber ṭum tawngin goal 15 a khung tawh a, Brazilian forward hian inelna hrang hrangah goal 25 a khung tawh. Alex Oxlade-Chamberlain chu tun season Premier League-ah goal kuaah (3 goals, 6 assist) a inrawlh tawh a, heti zata tam hi Premier

League goal-ah season khatah a la inrawlh ngai lo.

Beiseina thamral
Arsenal manager Arsene Wenger-a'n a tih ṭhin dan lo ang takin transfer bazar-ah sum tam tham tak seng mah se beisei erawh an phak thei chuang lo. Pathianni zan khan Newcastle United lakah an tlawm a, khualmualah league match nga chhung chu a zawnin an tlawm ta–December 1984 hnua khualmuala an chet chhiat ber ṭum an tawng mek.

Gunners-in league match 33 an khelh aṭangin vawi 11 tlawm hmel an hmu tawh a, Wenger hnuaia league-a season khata an tlawm hnem ber an tawng mek–match nga khelh tur an la neih avangin an chak loh zat hi la pung leh thei a ni.

Wenger-a naute hian tun dinhmunah point 54 nei mekin champion Manchester City chu point 33 ngawtin an phak lo a, 1995 hnua match 33 khelh hnua point an hmuh tlem ber ṭum an tawng mek–palina Tottenham chu point 13-in an la phak lo a, league aṭanga Champions League khelh tum ai chuan Europa League champion nichunga Champions League khelh tum chu Gunners tan a finthlak tawh zawk.

Super sub Giroud
Inrinni zanah 2-0 in Chelsea chu Southampton lakah an tlawm mek a, minute 61-naah Olivier Giroud luhtir a ni. Minute kaw hnua lawkah Giroud-a'n goal a khung nghal a, a goal hmasa zawk a khung aṭanga minute riat hnuah a goal hnihna khung lehin 3-2 in an chak daih.

Giroud-a'n Premier League-ah substitute ni chunga goal 19 a khungna chiah a ni a, substitute nichunga goal 29 khungtu Jermain Defoe chiah bench aṭanga tlan luha goal khung tam lamah a tluk lo.

Arsenal striker hlui hian Premier League-ah match 121 inkhel bul ṭan tawhin goal 56 a khung a, minute 183 dana goal khat zel khung ang a ni. Substitute bench aṭanga tlan lutin French striker hian Premier League match 67 a khel a, goal 19 a khung–minute 67 dana goal khung ang a ni thung a, Super Sub tih loh rual a ni lo.