Champion lai hmaah TNT fiahna
Mizoram Volleyball Association buatsaih RS Traders Pro Volleyball League chu zanin hian final khel tur a chiang dawn.
Champion lai Hunthar Veng leh Thutak Nunpuitu Team (TNT) an inhmachhawn ang, tualchhung volleyball ngaina tuten inkhel hmuhnawm en tumin R. Dengṭhuama Indoor Stadium an pan khawm ang.
Nizan khan Durtlang North leh Tuichangral ten semifinal hmasa zawk an khel tawh a, he thu buatsaih lai hian result kan hre hman lo. April 20, Zirtawpni zanah final khelh tur a ni dawn.
Thawnthu hlui
TNT leh Hunthar Vengte hi tualchhung volleyball-a chanchin ngah an ni a, sulhnu pawh an nei ṭha dun hle. PVL bikah Hunthar Veng hian record an nei ṭha zawk, vawi thum intawng tawhin hnehna an chang fai vek.
An intawn hnuhnung ber chu March 28 zan kha niin, champion lai Hunthar Veng hian 18-25, 25-23, 25-18, 15-25, 15-11 in hnehna an chang. Team pahnihte point hmuh zat en chuan a chak zawk hian vanneihna an mamawh tel tih a chiang.
Hunthar lamin an hneh hnu lakah inrintawkna an nei sang dawn a, chutihrualin team ṭha TNT pawhin an chetsualna ngaiah chetsual loh an tum ang–tun PVL bika inkhel hmuhnawm leh ngaihven hlawh ber ni thei tura ngaih a ni.
A vawi hnih nan
Vanlalmawia kaihhruai Hunthar Veng hian rinkai ni chungin inelna bul ṭan mah se beisei angin an khel chhuak nghal bik lo. League match vawi nga an khelh tawhah vawi thum hnehna an chang a, vawi hnih an chak lo.
Hunthar hian an match hnuhnungah Anastasia, Electric Veng chu set hloh loin hneh mah se an lawm a kim lo. Hliam vangin setter rinrawl Remsangzuala leh an player pawimawh Lalduhsanga an hmang thei lo a, TNT hmaah Remsangzuala inlan thei tura ngaih a nih tawh laiin ke vung avangin Duhsanga'n ngai a la awh lo thung.
Huntharin hnehna an chan theih nan state pawn aṭanga an lakluh Ranveer a pawimawh tih a chiang, a khelh hnuhnung vawi liah point 200 hmuin point 67 a paih, a inlan apiangin vawi 50 hlap tlain 16.75 a tisual a, Hunthar player zingah a filawr hle.
Season hmasa nena khaikhin chuan Hunthar hian tualchhung player langsar an kawl tam tawk lo, a vawi hnih nana champion an duh a nih chuan Lalrinhlua, Samson VL Chhanchhuaha leh Lalremsangaten te chuan Ranveer an thlawp ṭhat a ngai dawn a ni.
Mizo hlangin
MVA hnuaia inelna lian leh ngaihhlut ber PVL-ah Mizo player hlanga champion hmasa ber nih tumin TNT an inlan a, Lalrindika enkawl team hian an duhthusamin khel rih lo mah se team dang barakhaih thei turin theihna an nei.
Muanna Veng team hian state pawn player nei lo mah se an thawhhona ṭha chu an hmachhuan ṭhin a ni. Mizo tlangval Lalramnunfela'n vawi nga an khelh tawhah point 97 hmuin Mizo zinga thawk chhuak tam ber a ni a, point 26 a hloh. Hunthar spiker Ranveer nena khaikhinin hniam zawk viau mah se mimala innghat lovin TNT-in an khel a, an chet fuh ṭum a nih chuan sut an harsa.
Rama bakah Sadraka'n danglamna siam khawpin team a ṭanpui thei tih a lantir tawh. Player naupang beiseiawm Laldinchhunga'n inringtawk taka a khel a nih chuan innghahna tham a ni a, point 10 chuang hmu thei captain Vanlalchhantluanga Sailo a awm bawk.
A khelh apianga point 20 deuhthaw hlawh chhuak thei Rama'n net bulah lehlam ball vuak a dang tla hnem a, a pawimawh dawn. Ranveer-a lakah ṭha taka a khel a nih chuan TNT-in a vawi khat nan Pro Volleyball-ah Hunthar hneh turin hun ṭha an nei ngei ang.