Bayern hmachhawn tur Real tan inbuatsaihna
Real Madrid chuan zanin dar 1:00-ah league match khel turin Athletic Bilbao an mikhual dawn a, league nomawi beisei tawh lo mah se Champions League thlir tur a la awm avangin tih mai mai a thiang lo.
Zinedine Zidane-a enkawl team hian table-ah pathumna dinhmun an luah mek a, an hnuai chiaha awm Valencia aiin point hnih chiahin an sang zawk.
La Liga aṭangin table-a palina chinin Champions League an khel ṭhin a, palina tan playoff khelh a ngai. Real tan playoff pumpelh turin Valencia chunga season khar a pawimawh ang.
Real leh Champions League
Real-in La Liga-ah beisei phak lo mah se an tlangnel ṭhinna Champions League-ah erawh an hlauhawm ngaiin an la hlauhawm reng a, semifinal an lut leh tawh.
Spanish champion hian April 25 zanah Bayern Munich nen Champions League semifinal first leg an khel dawn a, Allianz Arena-ah an lenglut hmasa ang.
Real hian tun hnai season li chhung chu Champions League nomawi vawi thum an chawi tawh a, kuminah an champion leh a nih chuan Zidane-a tan 'Champions League hattrick' a ni dawn.
Real beisei neih dan leh record ropui an neih theih tur zawng zawng ngaihtuah chuan Zidane-a'n Bilbao lakah a player-te a chawlh hahdamtir a nih pawhin a mak lo ang.
Beidawn tizual Benzema
Zidane-a'n sawiselna karah pawh Karim Benzema a ring tlat a, mahse French striker hian tun season La Liga-ah goal nga chiah a la khung a, inelna hrang hrangah match 38 khelin goal kua chiah a khung - Real striker meuh goal khung atan chuan beitham tak a ni.
Spanish chanchinbu lar Marca chuan, "Goalkeeper chauh a hmachhawn pawhin a hmaa milian tak a lo ding ang maiin a zam ṭhin," tiin French striker hi a sawisel a, "A hun neih ṭhatah pawh amaha pet mai loin pass tur a zawng ṭhin. Hei hi mahni hmasial loh vang ni loin inrintawkna neih tlem vang a ni," tiin Benzema an chhilh zui bawk.
Zidane-a'n Juventus lakah Benzema lakah dawhtheihna a hloh ṭan tawh tih pholangin bench-ah a dah a, an league match hnuhnung bera Malaga an hmachhawn ṭuma Cristiano Ronaldo leh Gareth Bale te a chawlh hahdamtir ṭumin a khelhtir thung - zaninah a inlan chuan Bayern-a hmachhawn loh 'chance' a sang ang.
Isco disco
Tun hnaia Real player langsar pawl kan sawi dawn a nih chuan Isco hming lam rik loh a thiang lo. Season ṭantir lamah Spanish attacking midfielder hian rin hlawh tawk lo mah se tun hnaiah a theihna a pholang a, Zidane-a player rin pawl a ni leh tawh.
Midfield-a Luka Modric a awm lohin Real-in midfield-a inkhel thununtu tur an zawng ṭhin a, Cristiano Ronaldo awm lohin goal khungtu tur an zawng ṭhin bawk.
Malaga lakah Modric leh Ronaldo an inlan lo ve ve a, player langsar pahnih awm loh zanah Isco a langsar a, an hnathawh ṭhin ang thawk ve vein Real chakna hnar a ni - Bilbao lakah pawh a inlan a nih chuan ani hi innghahna tur a ni ang.