Inhnehtawkah Hammers an lawm zawk

Hun tawp hma chiaha Andy Carroll goal khung hmangin West Ham chuan an mikhual Stoke City lakah point khat an hlawh chhuak a, season thara Premier League khel zui turin beiseina an nei zui zel.

League match li chiah khelh tur a awm tawh a, Hammers hi relegation zone aṭangin point sarihin an him rih. Stoke erawh 17-naa awm Swansea City aiin point ngain an hniam zawk a, an dinhmun a him lo rih hle.

Sub pahnih
London Stadium-a inkhelah goal a lut thei mai lo, substitute Peter Crouch chuan minute 79-naah Joe Hart-a dan hman lohin a khung a, Potters tana Premier League-a a goal 44-na khungtu Crouch hian tun hnai an match 10 chhunga a vawi khat nan hnehna a chanpui ngei dawn niin a lang hman.

Mahse, point mamawh ve tho West Ham an beidawng duh bik lo. Bench aṭanga lut ve tho Carroll-a'n minute 90-naah an si phurh sut nan a volley lut a, an khelmualah point khat hlu tak a pet chhuak a ni. England international hian league match a khelh hnuhnung pathumah goal thum a khung.

West Ham manager David Moyes chuan, "Chak lo tur kan ni lo, kan theihtawp kan chhuah a nih phawt chuan malsawmna pawh kan dawng ṭhin a ni," a ti. Hammers hian point 35 an hmu tawh a, Moyes hian him tur chuan point 40 tal an mamawh thu a lo sawi tawh.

Stoke an tla dawn?
Stoke City boss Paul Lambert chuan West Ham laka a naute thawhrim dan a hmuh hmaih lo a, in hamtang tura an beiseina a la tawp bik loh thu a sawi bawk.

Lambert hian Janaury thla khan Mark Hughes thlakin Stoke hi a enkawl ṭan a, a match hmasa berah hnehna chanpui nghal mah se tun hnaiah a zawnin match 10 chhung chu chak ni hmel an hmu thei ta lo a ni.

Kum 48 mi Lambert chuan, "Season tir aṭang khan tuna kan khelh angin khel ni ila chuan a hniam pawlah kan awm lo ang. Kan hmabakah hian vawi thum hnehna kan chan a ngai ang," tiin chetsual a thian tawh loh thu a sawi.

A zawna season 10 chhung EPL khel tawh Stoke hian Burnley, Liverpool, Crystal Palace leh Swansea City te an la hmachhawn leh dawn a ni.