Durtlang North aia huaisen Tuichangral

Tuichangral chuan a vawi khat nan Pro Volleyball League final an khel dawn. Thawhlehni zan PVL semifinal inkhel hmuhnawm takah Tuichangral hian rinkai zawk ni chunga inlan Durtlang North chu 3-1 a hnehin final an in beng kai.

R. Dengṭhuama Indoor Stadium, Mualpuia inkhelah point 48 vaw chhuaktu Shivendra chu RFL Plastics Player of the Night atan thlan a ni a, he chawimawina hi a vawi nga dawnna niin, tun PVL bikah chuan ani aia record nei ṭha an awm rih lo.

India tan kum bithliah bakah senior team thlenga inlan tawh Shivendra-a'n point hmasa ber hlap chhuakin, set lina an khelha 24-22 a nih laiin Shivendra-a hlap an dan sak a, mah se Durtlang North thiampuipa Nakul Dev-a'n service out lehin league match lama an hneh tawh lakah 26-24, 25-16, 18-25, 25-21 in an tlawm.

Inlehthalna chu
Inkhel ṭan aṭangin Tuichangral an phur a, bul pawh an ṭan fuh hle. Feet 6 leh 6 inch zeta sang Shivendra-a'n hlap thla nghal ṭhuaiin, 3-0 in hma an hruai zui a, set li an khelh zingah set hnuhnung berah chiah point an hmu hmasa ni lo a dang pathumah chuan hmahruaitu an ni vek.

Khaw chhak team tan Mizo player an hmuhnawm a, set hnihna an khelh laiin Hlimen tlangval Ramngaihsanga chuan fing takin, tharum hmang miah loin point hnih a hmu thei a, Fabian Lallunghnema pawhin an mamawh hunah tak point a vaw chhuak thei bawk.

Tuichangral coach Eric Lalsangliana Pautu-in Hmangaihthanga a chhawr thiam a, Bawngkawn setter hi an palian Shivendra hlap tur siamsktu ber a ni a, ani hian Hosanna Lalawmpuia, PC Lalhruaimawia leh Lalruatpuia Ralte te tan ball duhthusam a siamsak deuh reng thei a ni.

Aizawl pawn aṭanga PVL team awmchhun hian inkhelh chhung zawngin tha an thlah lo a, ṭantu pawh an nei ṭha. Hun pawimawh bera ngaih set lina an khelh laiin an thiampuipa Shivendra chuan point 18 ngawt hlawh chhuakin an chakna thapui a ni chiang hle.

Season hmasa lamah Eric-a hian Anastasia, Electric Veng leh Chhinga Veng te chu PVL final a khelhpui tawh. A zawna a vawi thum nan final-ah a naute a kaihruai dawn, tun season league match-a palina ni chunga final lut thei Tuichangral hian TNT leh Hunthar Vengte inkhela chak zawk an hmachhawn leh dawn.

Durtlang North an chuai
League match vawi nga an khelha hnehna chang vek thei Durtlang North tan chuan 3-1 a an hneh tawh hi huphurh chi an ni lo. Mahse, semifinal-ah beisei angin an khel lo. A tir aṭangin a hnufual zawkah an ṭang chho deuh zel, set khatnaah 18-18 nih rual ve thei mah se hun pawimawhah tak a chesual zawkah an ṭang zel.

Season hmasa lama Hunthar Veng champion puitu Lalbiakmuana chu set hnihnaah dar hliam vangin lak chhuah a ngai. 2017 Mizo Best Player hi set hnuhnung bera 21-18 a an hnufual laiin rawn lut leh mah se danglamna thlen turin hunin a daih tawh bik lo.

Durtlang North hian hmahruaitu an nih vawt khatna tawng tur pawhin an nghah rei a ngai hle. Set thumna tir lamah 4-3 in hma an hruai ve zuai a, an hmahruaina hian rei a daih chuang lo. Set an lak theih nan Zomuanpuia, Laltlanchhuaha leh Lalnunmawia ten an thawkrim hle a, beiseina chhi nung hram hram mah se rei a daih thei lo.

Jimmy Lalbiakdika kaihhruaina hnuaia an vawi hnih inlannaah Durtlang North lamin thawhhona ṭha an nei thei tawk lo. Nidanga an chakna hnar ni ṭhin Nakul-a'n point 32 zet nei thei mah se, point 16 zet a paih chu an khingpui lam tana ṭhatpui tham a ni.

PVL an vawi khat khelhnaah Durtlang North lamin champion an tum nghal ngam a, ṭantu mipui pawh an nei ṭha. Beiseina sang tak an neih hi tih tawpin awm mah se season thara ṭha zawka rawn kir ngei an tum ang.