FA Cup ngai pawimawh Spurs an chelh

Tottenham Hotspur-in Harry Kane hmangin Amex Stadium-ah goal khung hmasa mah se Pascal Gross hmangin mualneitu Brighton & Hove Albion hmangin an sut a, 1-1 in inkhel a tawp.

Premier League-ah Spurs-in match 34-ah point 68 hmuin palinaah an awm a, match khata khel tlem Chelsea-in point riat in an la pha lo a, Blues tan Champions League khelh theihna kawng tlem a la inhawng. Seagulls hian match rukah chak hmel an hmu lo nachungin London club laka point khat hmuh a hlu a, match li khelh tur an la neihah relegation zone aṭangin point riatin an la him bawk.

Kane–Top Scorer?
English striker Kane-a'n season hnih chhung top scorer a nih hnuah a lungthu kim nan goal khung tam ber nih a tum a, Stoke nen an inkhelh ṭuma Christian Eriksen-a goal khunga an pawm tawh pawh ama goal khunga chhalin an pe let leh a, sawisel hlawh deuh mah se goal 30 khung tawh Mohamed Salah erawh a hnaih sawt.

Thawhlehni zana Kane-a'n goal a khung leh takah chuan league-ah goal 26 a khung tling ta a, Liverpool forward Salah a phak lohna chu goal li chauh a ni. Spurs hian Watford, West Brom, Newcastle leh Leicester City te an la hmachhawn dawn a, golden boot inchuhna hi a la nung chho zel.

Arsenal legend Thierry Henry chuan, "Chak tumin goal khung ka tum a, thildang ka ngaihtuah lo. Ṭhiante siam sak a ṭul pawhin team ṭhatna tur a nih chuan ka siam sak leh mai bawk a. Ka sawi fo lo nangin ka sawi nawn leh duh, kei chuan goal ka khung aiin ka ṭhiante ka siam sak hian ka hlim ṭhin. Golden boot ni tur ṭhenkhat hi chu an duham ve deuh ṭhin a ni," tiin a sawi.

France international hlui hi season thum chhung a zawna top scorer ni thei a ni a, Kane-a hian a record nih rualpui theihna hun ṭha a nei mek avangin English striker lam hawi zawnga a ṭawng chhuak hi a mak hran lo.

FA Cup a pawimawh
Kum 2008 hnuah Spurs-in nomawi an la chawi leh lo a, Inrinni zanah Manchester United nen FA Cup semifinal-a an inhmachhawn dawn avangin Mauricio Pochettino-a'n player paruk ngawt a thlak a; Dele Alli leh Davinson Sanchez te chu dah ṭhat zingah an tel.

Spurs-in inkhel an thunun thei lo a, minute 48-naah Kane-a hmangin goal khung hmasa mah se minute hnih hnuah Brighton-in an sut nghal. Jose Izquierdo-a'n Spurs defender Serge Aurier lakah penalty hlawhchhuakin Pascal Gross chuan siphurh sut nan a hmang.

Seagulls-in point hmuh an phu a, amaherawhchu hun tawp dawn hnaiha Christian Eriksen cross Shane Duffy-a'n an lama a tiluh ṭep avangin an vannei telah a ngaih theih bawk.

Eng nge an sawi?
Tottenham manager Mauricio Pochettino chuan, "Inrinnia kan inkhel khan taksa leh rilruah nghawng a nei lian a, inkhel leh turin kan inpeih tawk lo. Chuvangin mi thar kan luhtir a, player thlak tam mah ila kan tum chu chak a nih avangin kan result-ah kan lawm lo," tiin a sawi.

Spurs hian kartawp khan Manchester City chu 3-1 in an hneh lo a, match hnih chhung chu chak hmel an hmu ta lo.

Brighton manager Chris Hughton chuan, "Kan phu ang result kan hlawh chhuak. Match li khelh tur kan la neihah Tottenham anga team ṭha laka kan khelh dan hian nasa takin min ti phur ang," tiin an khelh dana a lawm thu a sawi ve bawk.