World Cup-ah ka kal dawn - Ibra

Sweden tana inkhelh chawlhsan tawh Zlatan Ibrahimovic chuan World Cup-a a kal tur thu a sawi chiang a, khelmuala inlan tura kal tur a nih leh nih loh erawh a sawi lo thung.

Kum 36 mi forward hian Euro 2016 zawh rual khan ram tana inkhelh a chawlhsan tawh thu a puang a, mahse World Cup khel tura Sweden an tlin khan ram tana a inkhelh leh mai theih thu sawiin tunah World Cup a sawi ri leh ta.

Manchester United striker hlui chuan, "World Cup-ah ka kal ngei dawn a, thui tak erawh ka sawi dawn lo. Ka tel lohna World Cup chu World Cup tak tak a ni thei nang," a ti!

Barcelona, Inter Milan leh Paris Saint-Germain tan pawha khel tawh striker hi United nen inhriatthiam tawnnaa an inṭhen hnuin LA Galaxy lamah a kal a, MLS club tan hian match thum a khelhah goal thum a khung leh der tawh.

Ibra chuan, "Swedish pa satliah pakhat mai ka ni lo a, khawvel hriata Sweden pholangtu ka ni," a ti a, World Cup-a tel a phuzia a sawifiah thiam hle.