World Cup khelh tum Neymar

Brazil international Neymar chuan hliam vanga a chawlh reng hnuah World Cup khelh theih a inbeisei thu a sawi chhuak a, May 17-ah chuan training zawm theih a inbeisei.

Paris St-Germain forward hian February 25 khan league match-ah a ke ah hliam a tuar a, hei vang hian zai niin tun season-ah club tan a inlan tawh dawn lo. Neymar chuan, "May 17-ah ka dinhmun chiang takin kan hria ang a, ka inkhel thei tawh ang," a ti.

Khawvela footballer manto ber ni tura pound maktaduai 200-a PSG pantu forward chuan, "Kar hmasa pawh khan ka hliam hi endik a ni tawh a, beisei angin engkim a kaltluang. Tluang taka engkim a kal zel ka beisei.

"Nitinin enkawlna ka dawng reng a, ka hma lawka inchhawp hi mang rama ka lo man ṭhin World Cup a nih miau avangin training ka neih leh ṭan hmasak ber aṭangin ṭum dang zawng aiin ka thawkrim ang. He hun lo thleng tur atan hian kum li chhung ka nghak tawh a, a hnai tawh em em a ni," a ti.

Kum 2014 World Cup-ah khan Neymar hi a inlan a, semifinal-a Germany-in 7-1 a an sawpna inkhelah erawh hliam avangin a inlan lo. June-a khelh tur World Cup-ah hian Brazil chu champion lai Germany nen rinkai an ni mek.

Russia-a khelh tur World Cup-ah hian Brazil hian June 17 khian Switzerland nen an match hmasa ber an khel dawn a, June 22-ah Costa Rica hmachhawnin ni nga hnuah Serbia an inkhelhpui leh ang.