MFA-in Futsal tournament pathum buatsaih dawn

19th April, 2018

Mizoram Football Association Futsal Committee chuan May 2018-a season tawp hmain intihsiakna pathum buatsaih a tum a, season thar lo awm turah futsal chu huam zau zawka kalpui turin ruahmanna an siam bawk.

Asian Football Confederation Futsal Development Program aṭanga AIFF kal tlanga, MFA tana futsal ball 200 an pe chu MFA chuan lawmawm a ti hle. Hetihlai hian Nivia chuan MFA tan futsal ball pek chhunzawm zel a tum a, nimin khan Nivia aiawh leh MFA lam hi an indawr fel a, tun season chhunga MFA competition-ah hian MFA logo chuanna Nivia-in futsal ball a pek chu hman ṭhin a ni ang.

MFA-in inelna pathum a buatsaih turte hi club inelna bakah kum naupang inelna te a ni.

Division One Season Ending
Ruahman lawk tawh angin tun season chhungin MFA Futsal Division One tan tournament pathum buatsaih tur tih a ni a, a hnuhnung ber 'Season Ending Tournament' chu April 25-27 chhungin Lammualah neih a ni ang. Division One Season Ending Tournament-ah hian champion team-in Rs 10,000 an dawng ang a, pahnihnain Rs 5,000 dawngin semifinalist-in Rs 2,000 an dawng ang.

All Mizoram Junior Futsal Tournament
All Mizoram Junior (U-16) Futsal Tournament siam tura rel a ni a, May 8-11 chhungin Lammualah neih a ni ang. January 1, 2002 hnu lama piang chinin an khel thei ang. Team tel thei hi entry fee thehlut hmasa 64 chin an ni ang. Tel tur team-te hian veng/khaw hming an pu tur a ni a, veng/khaw khat aṭangin pakhat aia tam an tel thei ang.

Entry fee hi Rs 500/- a ni a, April 23, 2018 aṭangin MFA Office-ah pek theih a ni a, entry fee pe apiang hi hriat tur pawimawh awmna lehkha pek chhuah nghal an ni ang. Tel turte chuan inkhelh dawnah birth certificate (original) leh Adhar Card an keng tel tur a ni a, certificate lem hmang man chhuah an nih chuan amah chauh ni loin team pumpui pawh hrem theih an ni ang.

Prize Money:
Champions: Rs 10,000/- + Trophy
Runners Up: Rs 5,000/-
Semi Finalist: Rs 2,000/-

Note: Semi finalist chinin Asian Futsal Confederation aṭanga dawn Futsal Ball an dawng bawk ang.

MFA Futsal Cup
MFA Futsal Cup neih tur chu Chanmari Branch KTP nen tangkawpin May 14-19, 2018 chhung hian Lammualah buatsaih tur a ni ang a, hetah hian MFA hnuaia futsal club inziak lut zawng zawng (MFA Futsal League leh Division One) leh MFA Veteran Tournament-a khel team an tel thei ang. Lawmman tha tak siam a ni ang.