Car ṭha ber duhtu Ricciardo

Red Bull driver Daniel Ricciardo chuan Formula 1 driver champion ni turin car ṭha khalh a duh, a contract pawtsei tur chuan team ṭha ber an nih a duh thu a sawi chhuak.

Pathiannia tlan zawh tak Chinese Grand Prix-ah Ricciardo hian hnehna a chang a, hei hian beiseina a siam thar. Mahse, tun season tawp ruala a contract tawp mai tur a pawt sei dawn tihna erawh a la ni lo. Australian tlangval hi an elpui Ferrari leh Mercedes te nen sawizawm mek a ni.

Kum 28 mi Ricciardo chuan, "Car ṭha ber khalh ka duh, Red Bull hian hnehna kan chang zel thei a nih chuan a lawmawm ngawt ang. A nih loh chuan thutlukna siam turin thildang ka ngaihtuah tel a ṭul ang," tiin a sawi.

Ricciardo chuan sawi zawmin, "Team ṭha ber chu tute nge an nih theih nan chuan a la hma deuh. Tun season chhunga a vawi khat nan hnehna kan chang ve chiah a ni a, hlawhtling tur chuan ngelnghet taka kal a ngai. Intlansiak lehpekah hnehna kan chang zui thei a nih ngat chuan champion thei zingah kan tel tih ka sawi ngam ang," a ti.

Kumina intlansiak palina ni turin April 29 hian Azerbaijan Grand Prix an tlan dawn a, team champion lai Mercedes leh tun season bul ṭan fuh ber Ferrari te el turin Red Bull tan fiahna a ni ang.