Mumbai Indians tan Rohit a mawi

Indian Premier League-a an chak vawi khatna ni turin Mumbai Indians chuan Thawhlehni zan khan Royal Challengers Bangalore chu run 46-in an hneh a, captain Rohit Sharma chuan run 94 vaw chhuakin Mumbai mawina a ni.

Wankhede Stadium, Mumbai-a inkhelah mualneitu team an bat hmasa zawk a, over 20-ah run 213 ngawt siamin wicket ruk chiah a hloh. MI tan opener Suryakumar Yadav chu run pawh siam loin out nghal mah se a dinpui Evin Lewis chuan run 65 ngawt a rawn vaw chhuak.

Suryakumar hnu lawkah Ishan Kishan chu ball a hmachhawn vawi khatnaah a out ve bawk a, mahse Evin Lewis tana dinpuitu rinawm ni turin Rohit Sharma a lo pen chhuak. Mumbai captain hian ball 52 lek hmachhawn chungin run 94 a rawn siam a, a batting chu hmuhnawm tham a ni.

Mumbai-in Rohit Sharma leh Evin chet ṭhat zarzoin target pangngai tak an siam a, RCB tan awlsam taka umphak tur chi niin a lang lo.

Bangalore club tan captain Virat Kohli chu opener niin a rawn che ṭha nghal a, run 92 siamin a tawp thleng a dam! Mahse, India captain ṭhiante zingah run 20 pawh vaw kai thei dang an awm lo a, Kohli-a'n amah chauhin RCB a chhan thei bik lo.

Kohli hian IPL match 153-ah run 4,619 a siam tling ta a, IPL bika run siam hnem ber record thar a siam. IPL-a run 4,558 siam tawh Chennai Super Kings batsman Suresh Raina a khum.

Royal Challengers Bangalore hian over 20-ah run 167 siamin wicket riat an hloh a, run 46-in an target hi an umpha ta lo a ni.