Hmasawn mamawh McLaren

Tun season atan For­mula 1 intlansiak vawi thum a awm tawh a, inelna neih tawh aṭanga chhutin McLaren tan champion a beisei awm loh. Racing director Eric Boullier chuan hma an sawn hleithei lo chu mak a tih thu a sawi.

McLaren driver Fer­nando Alonso chu driver championship-ah parukna a ni mek a, point 22 nei tawh mah se hnehna a la chang miah lo. Grand Prix pathum an hmachhawn tawhah qualifier an tlan ṭumin a hmasa 10 zingah an la tel phak ngai lo.

Boullier chuan, "Eng­vangin nge qualifying-ah kan tlan muan a, inelna takah kan chet ṭhat leh fu si. Eng vanga team dang khan lo nge kan nih tih hi hriatthiam mai a harsa rih hle," tiin a sawi. McLaren hian Honda engine an hman ṭhin chu Renault engine-ah an thlak tawh a, season dang aiin bei­seina an nei sang hret.

Mahse, qualifying an tlan tawhah Alonso chu a tawn san ber ṭumin 11-na a ni a, a dang pahnihah 13-na niin; intlansiakna takah chuan Australia-ah pangana niin, Bahrain leh China-ah te chuan pasarihna a ni thung.

Spanish driver Alon­so hian season tirah khan Mercedes leh Ferrari te elphak tur chuan hmasawn an mamawh tih a sawi tawh a, an car khalhin a zir a nih phawt chuan driver dangte elphak turin an ṭha tawk tih a lantir thei a ni.