Barcelona an chelh; hma an hruai zel

Spanish La Liga-ah Barce­lona chu Celta Vigo-in an chelh a, 2-2 in an inhnehtawk. Thawhlehni zan inkhel result avangin Barca dinhmun erawh a danglam phah lo a, La Liga-ah hma an hruai chhunzawm zel.

Catalan club hian champion turin match nga khelh an la hmabakah point ruk bak an mamawh tawh lo - league match 33 chhung chu tlawm hmel an hmu tawh lo a, season hmasa tawp lam nena chhiar tel phei chuan match 40 chhung chu an tlawm tawh lo.

Barcelona hnaih bertu Atletico Madrid chu zanin dar 11:00 hian Real Sociedad khelmualah an inlan dawn a, Madrid khaw club hian hmabak match ruk an la neihah hnehna chang vek se, Barca chak lo vek pawh ni se Catalan club nen an point hmuh zat a in ang chiah ang a, head-to-head a dinhmun ṭha zawk Barca an champion ang.

Bench-ah Messi
Inrinni zanah Barcelona-in Copa del Rey final an khel dawn a, Sevilla nen an inhmachhawn ang. He inkhel tur hi rilrua dah chungin Barcelona boss Ernesto Valverde-a'n Lionel Messi leh Luis Suarez chu bench-ah a dah a, Gerard Pique leh Andres Iniesta te chu squad-ah pawh an awm lo.

Barca-in player langsar pali ngawt inkhel bul ṭantir lo mah se starting XI-ah Ousmane Dembele, Paulinho, Philippe Coutinho leh Paco Alcacer te ho an la awm avangin team ṭha tak an la ni tho tih a chiang a, Celta Vigo hneh turin an ṭha tawk.

Minute 36-naah Barca hian Dembele hmangin goal hmahruai an khung nghal a, mahse Celta-in awlsam taka tlawm bik erawh an tum lo. Mualneitu team tan Jonny chuan minute 45-naah an si phurh sutna goal a khung ve legnghal a, chak zawk awm loin chawlhlawk an hmang.

Barca ral Aspas
Chawlhlawk hman a nih hnuah Barcelona-in goal khung tumin an nawr chhunzawm lehnghal a, Paco Alcacer chuan minute 64-naah an hmahruai vawi hnihna ni turin goal a khung ve leh a, Catalan club hi chak ngei tura ngaih an ni tawh - Paulinho chuan post a pet per bawk.

Mahse, minute 71-naah Sergi Roberto chu Iago Aspas laka a foul avangin hnawhchhuah a ni a, Spanish striker Aspas hian minute 82-naah an si phurh sut zawhna goal a khung zui. Liverpool striker hlui hian goal a khung dawnah a kutin ball a khawih tel tih chiang takin a lang a, mahse referee-in goal-ah a pawm miau si.

Kum 30 mi striker hian Barcelona a ngam hrim hrim. Catalan club-a hmachhawn tawh match ngaah goal nga a khung thei. Season hmasa khan inelna hrang hrangah goal 26 ngawt a khung a, tun season La Liga-ah ringawt goal 20 a khung tawh - World Cup-ah Spain team-ah a tel a nih pawhin a mak lo ang.

Barca leh recordBarcelona-in hnehna chang lo mah se record duhawm erawh an siam chhunzawm zel a, Celta nen an inhnehtawk chiah khan La Liga-a season khata match 33 chhung a zawna hneh lo nei lo hmasa ber an ni.

Catalan club hian match 33 chhung hian vawi 25 hnehna an chang a, vawi riat an khingpui an inhnehtawkpui. 1979-80 season khan Real Sociedad chuan match 32 chhung tlawm hmel hmu loa kaltluangin record an lo siam tawh a, Barca hian tunah chuan an khum ta.

Barcelona hian league hmasa nena belhkhawmin match 38 chhung tlawm hmel hmu lo record Sociedad vekin an lo siam tawh chu an lo khum tawh bawk a, chanchin lawmawm dang chu Dembele goal khung kha La Liga-a a goal hmasa ber a ni.

Valverde-a insawifiah
Barcelona coach Ernesto Valverde-a'n Spanish Cup final thlirlawk chunga a naute a siksawi nasat avangin sawisel a tawk a, a insawifiah. Spanish coach chuan, "Player ṭhenkhatin an khel zawn rei lutuk a, ka tan chuan thutlukna dik a ni. Tunah chuan Spanish Cup final thlir a hun ta," a ti.

Kum 54 mi manager chuan inkhel thlirkirin, "Keini chuan hnehna chan chiah kan ngaihtuah a, mahse kan chan tawkah erawh lungawi kan zir thiam a ṭul a ni.

"Ka ngaihdanah chuan kan khel ṭha zawk a, mahse red card kan chawi hnuah erawh ruahmanna thlak a ngaih phah thung. Engpawhnise point khat kan hlawh avangin ka lawm a, tunah chuan point ruk chiah kan mamawh ta," a ti a, champion an hnaih tawh tih a hai lo.