Treble champion beiseitu Bayern an chak

Bayern Munich-in treble champion kawng an zawh chho zel a, Thawhlehni zan khan DFB Pokal semifinal-ah Bayer Leverkusen 6-2 in an hneh. Captain Thomas Muller chuan hattrick siamin Javi Martínez, Thiago Alcantara leh Robert Lewandowski ten Bavarians tan goal khat ṭheuh an khung bawk.

Nizan khan semifinal pakhat zawkah Schalke 04 leh Eintracht Frankfurt te an inkhel a, result kan hre hman lo. Frankfurt manager Niko Kovac hi season thara Bayern enkawltu tur a ni a. German Cup final hi May 19-ah khelh a ni ang.

An tuihal
German Cup semifinal ticket an hralh zo vek a, BayArena-ah entu an khat ṭhap. Bayern Munich chak duhin an tuihal tih a lang a, Jerome Boateng-a ball vawrhluh chu Thomas Muller-a'n tauh fuhin Leverkusen keeper Bernd Leno-a'n dang mah se a per chu Javi Martínez tan khung nuam tak a ni.

Robert Lewandowski class san zia a lang zui a, minute kuanaah Franck Ribery ball vawrh luh chu Polish striker hian tawih zetin goal kilah a khung. Bavarians hian tun season-ah bul an ṭan ṭha lo a, chutiang tho chuan inkhelh ṭantirh aṭanga nung ṭha taka ṭan pawh an nei meuh lo a, tun ṭum hi bul an ṭan ṭhat ber ang hiala sawi theih a ni.

Tlarhnung pawp
First half rang takah Bayern tlarhnung an buai tel a, Lars Bender-a'n buai nuaih karah minute 16-naah siphurh a sut ṭhen a, German defender Mats Hummels-a'n a tawnhriat a lantir lo a, buai ho zingah telin a awmna hmun a fuh lo.

First half-ah goal dang a luh belh tawh lo a, manager Jupp Heynckes a lawm tawk lo tih a lang.

Bayern tak tak
Second half Bayern erawh an dang hlak a, captain Thomas Muller-a'n hattrick a siam bakah Thiago Alcântara-a'n goal khat a khung bawk.

Bayer Leverkusen tan Leon Bailey-a'n 5-1 a nih laiin freekick hmangin goal hnihna khung mah se inkhel result a danglam pha lo a, hun tawpa scoreline chu 6-2 a ni.

Boateng leh Ulreich
German defender Boateng chu kil tinah a awm a, midfield-ah vawi tam Leverkusen nawr let tur a dang a, goal ruk luhna inkhelah defender ni mah se a langsar pha.

Bayern-in keeper Manuel Neuer an la chhawr thei lo a, a aia lut Sven Ulreich-a'n tun dinhmunah chuan World Cup-a Germany champion pui thei keeper Neuer hi a thlak zo rih hle.

Ulreich hian Kevin Volland leh Karim Bellarabi te goal khung tur a dang a, kum 29 mi German keeper hi inkhelh banah pawh manager Jupp Heynckes-a'n a fak hle.

Heynckes chuan, "Inkhel thununtu ni mah ila Sven Ulreich hian vawi engemaw zat chu min chhan a, a thawhrim rah a seng mek a. Neuer-a awm loh laia pathian rawn tirh ni berin ka hria," tiin keeper a fak.

Treble champion?
Bayern hi Bundesliga-ah an champion tawh a, German Cup-ah final thleng tawh bawkin an hmabak chu Champions League semifinal a ni a, Europe-a an khingpui tur erawh champion lai Real Madrid an ni.

Bayern hian Heynckes-a ho hian 2012-13 season khan nomawi ngaihhlut pathum an chawi tawh a, tun ṭumah hian vawi hnih treble champion theihna hun ṭha an nei a, an ti thei a nih chuan Barcelona record an tluk pha chiah ang.