Tuichangral hmachhawn tur Hunthar Veng

Hunthar Veng chuan Thutak Nunpuitu Team hnehin RS Traders Pro Volleyball League final an in beng kai a, zanin dar 8:00 hian Tuichangral nen nomawi an inchuh ang. R. Dengṭhuama Indoor Stadium, Mualpuiah tual­chhung volleyball ngainatute an pungkhawm dawn a, inkhel en man Rs 50 a ni ang.

Nilaini zan khan semifinal hnu­hnung zawk khelh niin, champion lai Hunthar Veng hian TNT lakah 25-17, 25-19, 25-18 (3-0) in hnehna an chang a, a zawna PVL champion hmasa ber nih an tum dawn a ni. Mahse, an hna a awlsam dawn lo, final-a an hmachhawn tur Tuichangral hi league round lamah an ngam loh tawh an ni.

Hunthar an lian
Mizo hlanga champion tum TNT lakah Hunthar Veng an lian a, an chungnun chhan chu Ranveer a ni. RFL Plastics Player of the Night atana thlan Ranveer hian Muanna Veng team lakah point 40 zet a hlawh chhuak thei, point 11 chiah a paih thung.

Hunthar Vengin Ranveer an thlamuanpui viau a, chutihrualin Lalrinhlua pawh danglamna siam thei a ni. Rinhlua hian semifinal-ah point 14 zet a nei thei a, tun PVL bika a chetṭhat ber ṭum a ni. Anni pahnih hi Tuichangral tana buaina thlen turin an ṭha tawk hle.

Vanlalmawia kaihhruai Hunthar Veng hian season hmasa khan hneh loh nei loin nomawi an chawi a, kuminah erawh an kalkawng a awlsam bik lo. League round-ah Tuichangral leh Durtlang North an hneh lo a, pahnihna ni chungin semifinal an lut - nomawi humhim an duh a nih chuan point hmasa ber aṭanga a tawp ber thlengin an ṭan mar a ngai ang.

Tuichangral
A vawi khat nan Tuichangralin PVL an khel a, champion lai Hunthar Veng nen set nga an khelh hnuah hnehna an chang thei. League round lama an hneh tawh team hi an huphurh hran lo ang, Aizawl khaw pawn team hian nomawi an chawi a nih pawhin a mak lo ang.

Coach Eric Lalsangliana Pautu-in semifinal-ah awmze nei taka a naute remkhawmin league hmahruaitu Durtlang North an hneh thei. Durtlang North lakah Shivendra-a'n point 48 ngawt a hlawh chhuak a, India tana inlan tawh Shivendra a khelh ṭhat theih nan hian Hlimen tlangval Ramngaihsanga leh Bawngkawn setter Hmangaihthanga te chu player pawimawh an ni bawk.

Tuichangral hian inrintawkna sang tak nen court an lut dawn a, an tana chanchin lawmawm loh pakhat a awm thung. Fabian Lallunghnema chuan Indian Navy a zawm avangin zaninah a inlan thei dawn lo. Hosanna Lalawmpuia, PC Lalhruaimawia leh Lalruatpuia Ralte kutah mawhphurna a sang sawt dawn tihna a ni.

Sulhnu ṭha
Mizoram Volleyball Association hnuaia inelna lian ber PVL final hi player ṭha rual inelna tur a nih rualin, tualchhung coah ṭha pahnihte thluak hmanga an in­beihna tur a ni tel bawk.

Tuichangral coach Eric hian PVL season hmasa berah Anastasia, Electric Veng enkawlin nomawi an chawi a, season hmasa khan Chhinga Veng chu final a luhpui bawk. Mahse, PVL 2 nomawi inchuhna inkhelah Vanlalmawia kaihhruai Hunthar Veng an hneh lo.

Season hmasa ang bawkin kuminah league round-ah Hunthar Veng hi an chak lo leh a, Mawia hian final-ah thawnthu hlui anga nomawi chawi nawn an tum ang. Eric-a erawhin vawi li an in hmachhawn tawh a, vawi thum a hneh tawh Mawia lakah a vawi li nan hnehna chan a tum dawn a ni.