Mourinho 'vauna' United player 'thahrui' Bournemouth 0–2 Manchester United

Manchester United manager Jose Mourinho-a'n Nilaini zana Bournemouth nen an inkhelh hmain a player zingah tumah 'inkhel tur chiang sa' an awm loh thu a sawi a, player khel ṭha lo tan Inrinni zana Tottenham

Hotspur nen FA Cup semifinal an khelh hunah hmun a awm loh tur thu a sawi bawk.

Mourinho vaunain United player zingah ring takin thu a sawi a, West Brom laka 0-1 a mualpho hlim team hian an mikhualna ramah Bournemouth chu 2-0 in an hneh.

United tan Chris Smalling leh substitute Romelu Lukaku ten goal khat ve ve an khung a, Cherries-in a chhanletna tur an nei thei lo.

Portuguese manager chuan, "Ka nauten FA Cup semifinal khelh an duh tih min hmuhtir a ni," tiin a player te khelh dana a lawm thu a sawi a, "A sang pali zinga tel lo tur chuan kan tan a harsa tawh zawk ang," tiin Champions League khel tura an him thu a sawi tel bawk.

Mourinho duhthlanna
United-in Inrinni zanah FA Cup semifinal an khelh dawn vangin Mourinho-a'n player chawlh hahdam tirna tur a nih chuan loh thu inkhelh hma aṭangin a sawi a, "Cherries nena khel te hi midang an hahdam theih nana lut an ni dawn lo a, an khel ṭha a nih phawt chuan FA Cup semifinal an khel ang," a ti.

Portuguese manager-in Baggies laka a starting XI aṭangin player pasarih ngawt a thlak danglam a, Marcus Rashford, Anthony Martial leh Jesse Lingard te tlarhmaah inkawp tir an ni a, tun hnaia hmuh tur vang tak Matteo Darmian, Luke Shaw leh Marouane Fellaini te inkhel bul ṭantir an ni bawk.

Alexis Sanchez, Romelu Lukaku leh Nemanja Matic te chu bench-ah hun hmantir an ni a, Antonio Valencia chua squad-ah hmuh tur a awm lo a, Smalling, Ander Herrera leh Paul Pogba te chu Baggies laka bul ṭan zingah a tir aṭanga Cherries hmachhawn awmchhun an ni.

United ṭha zawk
Red Devils-in an result duhawm lo mangṭhain Cherries 2-0 in an hneh a, inkhelh zawhah Mourinho chuan, "Tuna ka starting XI ngai chiah hi Spurs lakah ka hmang dawn lo. Mahse, khelmuala an chet dan hmang erawh chuan Tottenham hmachhawn an duh vek tih an pholang thung si," a ti.

Mourinho-a'n a sawi ang ngeiin United an khel ṭha a, an 'ṭhat dan ber' tia sawi chi erawh a la ni lo. Minute 28-naah Smalling chuan goal hmahruai a khung a, he goal hi Herrera-a'n Cherries tlarhnung a ṭhiah hnua Lingard-a'n Smalling tana a siamsak a ni a, 'team goal' a ni.

Lingard che vel a hmuhnawm takzet a, English forward hi Wembley-a inkhel bul ṭan zingah kan hmu a nih pawhin a mak lo ang. Pogba sawi hmaih a thiang lo–French midfielder hian sawiselna nasa tak karah a theihna a pholang leh ta a, Lingard thlaktu Lukaku-a'n minute 70-naa a goal khung kha Pogba ke aṭanga chhuak a ni a, fak a phu.

Pogba faktu Mourinho
Pogba-a'n Lukaku goal khung tur a siamsak khan tun season-a Premier League assist a vawi 10 neihna chiah a ni a, he inkhelah hian man of the match-ah thlan a ni. Mourinho chuan, "Award tih vel hi ka ngaihlu tehchiam lo. Mahse, khelh dan aṭanga teh a nih miau avangin Pogba hian a phu a ni.

"City lakah khan a khel ṭha em em a, Cherries lakah chuti bawk chu a ni," a ti a, Baggies laka khel ṭha lo player hian Bournemouth laka a khelh dan hmangin Mourinho rinna a hlawh chhuak leh taah a ngaih theih.

Chelsea boss hlui chuan team pumpui fak nghalin, "Ka player-te khelh dan kha en ila an professional em em em a, theihtawp an chhuah a, an tihturah khan an chiang em em a ni. Goal khung chakin kan tuihal a, tlarhnung kan veng ṭha bawk si," tiin a hlim hle.

Hei aia tam zawk...
Bournemouth laka hnehna an chan avangin Mourinho a lawm a, an league hman dan pumpui thlir erawhin Portuguese manager a lawm lo. Kum 55 mi manager chuan, "Kan khelh ṭhat tluan loh avanga champion thei lo kan ni.

"Top five team kan tumah khan point kan hlawh chhuak vek a, mahse relegate tur ngei team kan tum tein point kan hloh leh lawi si. Tluang taka khelh kan thiam loh vanga tun dinhmun hi thleng kan ni. City hi an thiam avanga champion an ni tih ka pawm a, mahse insiamṭha hret ila chu tuna ka point hmuh sa baka point 10 nei thei kan ni," a ti.

Mourinho chuan, "Nomawi chawi dan ka hria. Mi thar zingah la hre lo in awm takin ram hrang paliah league nomawi pariat ka chawi thei. Chuvang chuan engvanga hnehna chang ṭhin nge kan nih ka hria a, kan tlawm ṭhin chhan pawh ka hria," a ti a, an chak lohna thuam ṭha tura theihtawp an chhuah thu a sawi.